سہیل آفریدی کی زیرصدارت خیبرپختونخوا کابینہ کا اہم اجلاس آج ہوگا
پشاور: (دنیا نیوز) وزیر اعلیٰ خیبرپختونخوا سہیل آفریدی کی زیرصدارت صوبائی کابینہ کا اہم اجلاس آج دوپہر 2 بجے سول سیکرٹریٹ پشاور میں ہوگا۔
ذرائع کے مطابق اجلاس کے لیے 29 نکاتی ایجنڈا تیار کر لیا گیا ہے جبکہ کابینہ اراکین اور متعلقہ محکموں کے سیکرٹریز کو اجلاس میں شرکت کے لیے باضابطہ مراسلہ ارسال کر دیا گیا ہے۔
اعلامیے کے مطابق اجلاس میں خیبرپختونخوا سیف سٹی پراجیکٹ کے لیے 3 ارب 82 کروڑ 50 لاکھ روپے کی سپلیمنٹری گرانٹ کی منظوری لی جائے گی، ضم شدہ اضلاع کے طلبہ کے لیے میڈیکل کالجز میں مختص کوٹے کی منظوری بھی کابینہ ایجنڈے کا حصہ ہے۔
مزید برآں اجلاس میں سکولز لیڈرز کو دوبارہ عارضی بنیادوں پر بھرتی کرنے کی منظوری لینے کی تجویز بھی پیش کی جائے گی، اہم فیصلوں کے پیش نظر اجلاس کو صوبے کی انتظامی اور تعلیمی پالیسیوں کے لیے نہایت اہم قرار دیا جا رہا ہے۔
