ریسٹورنٹس میں باربی کیو کیلئے سکشن بورڈ لگوانے کی عملدرآمد رپورٹ طلب
لاہور: (محمد اشفاق) لاہور ہائیکورٹ نے محکمہ ماحولیات سے ریسٹورنٹس میں باربی کیو کیلئے سکشن بورڈ لگوانے کے حوالے سے عملدرآمد رپورٹ طلب کر لی عدالت نے قرار دیا کہ پی ایچ اے پارکوں میں تعمیراتی کام سے پہلے جوڈیشل کمیشن کے ممبران کو آگاہ کرے۔
لاہور ہائیکورٹ کے جسٹس شاہد کریم نے شہری ہارون فاروق سمیت دیگر کی درخواستوں پر 4 صفحات پر مشتمل تحریری حکم جاری کیا جس میں کہا گیا ہے کہ پی ایچ اے نے رپورٹ جمع کرائی کہ 38 مساجد کے ساتھ واٹر پلانٹ فعال کر دیئے گئے ہیں۔
رپورٹ کے مطابق متعدد انڈسٹریل یونٹس کو واٹر ٹریٹمنٹ پلانٹ نہ ہونے کے باعث سیل کیا گیا ہے، عدالتی حکم میں کہا گیا ہے کہ جب تک ٹریٹمنٹ پلانٹ نہیں لگائے جاتے تب تک یہ یونٹ سیل رہیں گے۔
محکمہ ماحولیات ریسٹورنٹس میں باربی کیو کیلئے سکشن بورڈ لگانے کے حوالے سے رپورٹ جمع کرائے۔
عدالتی حکم میں مزید کہا گیا ہے کہ پی ایچ اے بغیر اجازت کسی بھی پارک میں کوئی تعمیراتی کام نہیں کرے گا، کسی بھی پارک میں کوئی کام کرنے سے پہلے پی ایچ اے ممبر جوڈیشل کمیشن کو آگاہ کرے گا، درخواستوں پر مزید کارروائی 23 جنوری کو ہوگی۔
