امریکی کمپنی نے طاقتور ترین بیٹری کا حامل فون متعارف کرا دیا
نیویارک: (ویب ڈیسک) امریکی بیٹری ساز کمپنی انرجائزر نے طاقتور ترین بیٹری کا حامل فون متعارف کرا دیا۔
ٹیکنالوجی ویب سائٹ کے مطابق انرجائزر نے ورلڈ موبائل کانفرنس میں اینڈرائیڈ فون متعارف کراتے ہوئے بتایا کہ طاقتور ترین بیٹری کا حامل فون رواں برس کے اختتام تک عام فروخت کیلئے پیش کیا جائے گا۔
مذکورہ کمپنی دراصل بیٹریز اینڈ پاور بینک بناتی ہے اور اب اسی کمپنی نے 28 ہزار ایم اے ایچ کے پاور بینک کو سمارٹ فون میں تبدیل کر دیا اور کمپنی نے بتایا ہے کہ وہ ہارڈ کیس پی 28 کے نامی فون متعارف کرائے گی۔
مذکورہ فون کو 87-6 انچ سکرین، 8 جی بی ریم اور 256 جی بی میموری کے ساتھ پیش کیا جائے گا، فون کے بیک پر تین کیمرے دیئے جائیں گے، جس میں سے مین کیمرا 64 میگا پکسل، دوسرا 20 اور تیسرا 2 میگا پکسل ہوگا۔
اسی طرح ہارڈ کیس پی 28 کے میں 16 میگا پکسل سیلفی کیمرا بھی دیا جائے گا، ساتھ ہی کمپنی نے دعویٰ کیا کہ فرنٹ کیمرے کو خصوصی طور پر ویڈیو کالز کے دوران بہتر کوالٹی کی ٹیکنالوجی سے اپگریڈ کیا گیا ہے۔
فون میں فنگر پرنٹ سینسر سمیت دیگر سکیورٹی فیچرز بھی دیئے جائیں گے جبکہ اسے ایںڈرائیڈ کے آپریٹنگ سسٹم میں پیش کیا جائے گا۔
دلچسپ بات یہ ہے کہ اس فون کا وزن بھی عام فونز کے مقابلے چار گنا زیادہ یعنی نصف کلو سے زیادہ ہوگا۔
کمپنی کے مطابق ہارڈ کیس پی 28 کے میں 28 ہزار ایم اے ایچ کی بیٹری کو 36 واٹ کے چارجر کے ساتھ پیش کیا جائے گا اور فون کی بیٹری محض ڈیڑھ گھنٹے میں 100 فیصد فل ہوجائے گی۔
کمپنی کے مطابق اگر مذکورہ فون کا استعمال کم رکھا جائے گا تو اس کی بیٹری 94 دن تک چلائی جا سکے گی اور اگر فون سے مسلسل 24 گھنٹے تک فون کالز بھی کی جائیں تو بھی اس کی بیٹری 5 دن تک چلے گی۔
کمپنی نے بتایا کہ مذکورہ فون کو اکتوبر 2024 تک فروخت کیلئے پیش کیا جائے گا اور اس کی ابتدائی پاکستانی قیمت 74 ہزار روپے تک رکھے جانے کا امکان ہے۔
