ماہرین فلکیات کا 7ذہین خلائی مخلوق والے ستارے دریافت کا دعویٰ
نئی دہلی :(دنیا نیوز ) فلکیات کے ماہرین نے ایسے سات ستارے دریافت کرنے کا دعویٰ کیا ہے جن پر کوئی انتہائی ذہین مخلوق ہوسکتی ہے، یہ ساتوں فلکیات کے حلقوں میں معروف ڈائسن میگا سٹرکچرز کے حامل ہیں۔
پراجیکٹ ہیفیسٹوز کے تحت دریافت ہونے ان ستاروں کی مدد سے ماہرین کو خلا میں کسی انتہائی ذہین مخلوق کی موجودگی کے حوالے سے تحقیق میں غیر معمولی حد تک مدد ملے گی، نئے ستاروں کی دریافت ٹیکنالوجیز سے متعلق انسان کی مہارت کو چیلنج کرنے والا عامل ہے، اب ماہرین کو نئے سرے سے کائنات کی تفہیم کے حوالے سے سوچنا پڑے گا۔
بھارتی میڈیا کی ایک رپورٹ کے مطابق انسان خلا میں جس قدر آگے بڑھ رہا ہے، کسی انتہائی ذہین مخلوق کی موجودگی کے امکان کے حوالے سے تحقیق کا جوش و خروش بھی بڑھتا جارہا ہے، نئے ستاروں کی دریافت ڈائسن سفیئر میگا سٹرکچرز کے تصور کی بنیاد پر ہوئی ہے، سائنس دانوں کا خیال ہے کہ ان میگا سٹرکچرز کے ذریعے انتہائی ذہین خلائی مخلوق دوسرے ستاروں سے توانائی کشید کرتی ہے۔
واضح رہے ڈائسن اسفیئر کا تصور طبعیات دان فریمین جے ڈائسن نے 1960 میں پیش کیا تھا، خلائے بسیط میں کسی مخلوق اور اُس کی شاندار ذہانت کی تلاش کے حوالے سے یہ ٹیکنوسفیئرز غیر معمولی اہمیت کے حامل ہیں۔
