واٹس ایپ نے صارفین کیلئے مزید 2 بہترین فیچرز متعارف کروا دیئے
![](https://img.dunyanews.tv/news/2024/August/08-18-24/news_big_images/831612_77145253.jpg)
کیلیفورنیا: (ویب ڈیسک) واٹس ایپ میں 2 نئے بہترین فیچرز کا اضافہ کیا جا رہا ہے جو صارفین کے لیے کارآمد ثابت ہوں گے۔
ان میں سے ایک فیچر صارفین کی سکیورٹی اور پرائیویسی سے متعلق ہے جبکہ دوسرا سٹیٹس پر اپنے جذبات کے اظہار میں مدد فراہم کرے گا۔
واٹس ایپ کو 2 ارب سے زائد افراد استعمال کرتے ہیں اور بیشتر افراد اس ایپ میں نامعلوم اکاؤنٹس کی جانب سے بھیجے گئے پیغامات سے پریشان رہتے ہیں، یہی وجہ ہے کہ میٹا کی زیرملکیت میسجنگ ایپ نے صارفین کے تحفظ اور پرائیویسی کے لیے ایک بہترین فیچر متعارف کرایا ہے۔
بلاک ان نون اکاؤنٹ میسجز (Block unknown account messages) نامی یہ فیچر ابھی اینڈرائیڈ ڈیوائسز کے لیے واٹس ایپ کے نئے بیٹا (beta) ورژن میں متعارف کرایا گیا ہے۔
اس فیچر کے ذریعے صارفین نامعلوم اکاؤنٹس کی جانب سے بھیجے جانے والے میسجز کو بلاک کرسکیں گے، یہ فیچر خودکار طور پر اس وقت نامعلوم اکاؤنٹس کے میسجز بلاک کردے گا جب ان کی تعداد ایک مخصوص حد سے زیادہ ہو جائے گی۔
رپورٹ کے مطابق ابھی اس فیچر پر کام جاری ہے تو یہ بیٹا ورژن استعمال کرنے والے صارفین کو بھی دستیاب نہیں، اس لیے یہ کہنا مشکل ہے کہ کب تک تمام صارفین کے لیے متعارف کرایا جائے گا۔
دوسرا فیچر سٹیٹس ایپ ڈیٹس پر کوئیک ری ایکشن کا ہے، یہ فیچر بھی اینڈرائیڈ ڈیوائسز کے لیے واٹس ایپ کے بیٹا ورژن میں متعارف کرایا گیا ہے۔
رپورٹ کے مطابق جب آپ کسی سٹیٹس کو دیکھیں گے تو ریپلائی ٹیکسٹ باکس کے برابر میں ہارٹ کی شکل کے بٹن پر کلک کرکے آپ اسے لائیک کرسکیں گے، جب کوئی صارفین آپ کے سٹیٹس پر ری ایکٹ کرے گا تو انسٹاگرام سٹوریز کی طرح آپ اسے سٹیٹس ویورز لسٹ میں دیکھ سکیں گے۔