ٹرمپ پر حملہ کرنے والے شوٹرکے فون تک رسائی مل گئی: ایف بی آئی
واشنگٹن: امریکی تفتیشی ادارے فیڈرل بیورو آف انویسٹی گیشن (ایف بی آئی) کا کہنا ہے کہ تکنیکی ماہرین نے سابق صدر ڈونلڈ ٹرمپ پر حملہ کرنے والے شوٹرکے فون تک رسائی حاصل کر لی ہے۔
امریکی خبر رساں ادارے کے مطابق مشتبہ حملہ آور سے ملنے والی الیکٹرانک ڈیوائسز کا تجزیہ کیا جا رہا ہے،ایف بی آئی کا کہنا ہے کہ گواہوں،عینی شاہدین اورقانون نافذ کرنے والے اہلکاروں سمیت تقریباً 100 افراد سے پوچھ گچھ کرچکے ہیں۔
دوسری جانب وائٹ ہاؤس نے کہا ہے کہ ٹرمپ پر حملہ کرنے والے شخص کوکس کی حمایت حاصل تھی یا اس کی کیا وابستگی تھی؟ اس کا علم نہیں جبکہ امریکی اخبار کی رپورٹ کے مطابق ٹرمپ پر جس رائفل سے فائرنگ کی گئی وہ 11 سال پہلے خریدی گئی تھی۔
خیال رہے کہ ہفتے کو امریکا کے سابق صدر ڈونلڈ ٹرمپ پر انتخابی ریلی کے دوران فائرنگ ہوئی جس سے وہ زخمی ہوگئے اور فائرنگ سے ریلی میں شریک ایک شخص بھی ہلاک ہوا جب کہ حملہ آور کو فوراً ہی مار دیا گیا۔
