میئر لندن صادق خان نے الیکٹرک گاڑیوں کیلئے ٹریفک فیس میں رعایت ختم کردی
لندن: (دنیا نیوز) میئر لندن صادق خان نے الیکٹرک گاڑیوں کیلئے ٹریفک فیس میں مکمل رعایت ختم کردی، آج سے الیکٹرک گاڑیوں پر بھی ٹریفک فیس لاگو ہوگی۔
ٹرانسپورٹ فار لندن (TfL) کے مطابق اس فیصلے کا مقصد شہر میں بڑھتے ہوئے ٹریفک مسائل پر قابو پانا اور پبلک ٹرانسپورٹ کے استعمال کو فروغ دینا ہے، حکام کا کہنا ہے کہ گزشتہ برسوں میں الیکٹرک گاڑیوں کی تعداد میں نمایاں اضافہ ہوا ہے جس کے باعث سڑکوں پر دباؤ بڑھ رہا تھا، اس لئے پالیسی میں تبدیلی ناگزیر ہو گئی تھی۔
میئر لندن نے چارج میں بھی بڑی تبدیلیوں کا اعلان کیا ہے، نئی پالیسی کے تحت روزانہ چارج 15 پاؤنڈ سے بڑھا کر 18 پاؤنڈ کر دیئے گئے ہیں، جس کا اطلاق مقررہ اوقات میں وسطی لندن میں گاڑی چلانے والوں پر ہوگا، حکام کے مطابق اضافی آمدن کو پبلک ٹرانسپورٹ، سائیکلنگ اور ماحول دوست منصوبوں پر خرچ کیا جائے گا۔
مزید بتایا گیا ہے کہ چارج میں رعایت حاصل کرنے کے لئے گاڑی مالکان کو آٹوپے سسٹم میں رجسٹریشن کرانا لازمی ہوگا، آٹوپے کے بغیر چارج کی ادائیگی پر اضافی جرمانہ بھی عائد کیا جا سکتا ہے، ٹرانسپورٹ حکام نے شہریوں کو ہدایت کی ہے کہ وہ بروقت رجسٹریشن مکمل کریں تاکہ اضافی چارجز سے بچا جا سکے۔
ناقدین کا کہنا ہے کہ اس فیصلے سے الیکٹرک گاڑیوں کے استعمال کی حوصلہ شکنی ہو سکتی ہے تاہم میئر لندن کا مؤقف ہے کہ ماحولیاتی بہتری کے ساتھ ساتھ ٹریفک کنٹرول بھی ناگزیر ہے اور یہ اقدامات شہر کے مجموعی مفاد میں کیے گئے ہیں۔
