اسرائیل کا بوشہر نیوکلیئر پاور پلانٹ پر حملہ: ایران نے جواب میں تل ابیب کو نشانے پر رکھ لیا، متعدد زخمی
تل ابیب: (دنیا نیوز) اسرائیلی شعبہ ہنگامی خدمات کے حکام نے کہا ہے کہ ایران کی جانب سے میزائل داغے جانے کے بعد ملک کے وسطی علاقوں میں کم از کم 12 افراد زخمی ہوئے ہیں۔
اسرائیل کی ایمرجنسی سروس میگن ڈیوڈ آدوم کے مطابق تل ابیب کے قریب واقع شہر بنی براک میں 9 افراد کو ابتدائی طبی امداد فراہم کی گئی، جنہیں بعدازاں مقامی ہسپتالوں میں منتقل کر دیا گیا، زخمیوں میں ایک 23 سالہ نوجوان بھی شامل ہے جس کی حالت درمیانی نوعیت کی ہے اور اسے پیٹ اور سر پر شیل کے ٹکڑوں سے زخم آئے، جبکہ 8 افراد معمولی زخمی ہوئے ہیں، جبکہ ایمرجنسی سروس کا کہنا ہے کہ قریبی علاقے گیوات شموئیل میں بھی 3 افراد زخمی ہوئے ہیں۔
خبر رساں ادارے اے ایف پی کی جانب سے نشر کی گئی ویڈیوز میں بنی براک میں عمارتوں کو شدید نقصان پہنچنے کے مناظر دکھائے گئے، جن میں ایک بالکونی کا گاڑی پر گرنا بھی شامل ہے، جبکہ بعض تصاویر میں ایک عمارت کی بالائی منزل کے فلیٹ کے نچلی منزل پر گرنے کے شواہد ملے ہیں۔
اسرائیلی فوج نے بتایا ہے کہ آج شام کے دوران ایران کی جانب سے آنے والے میزائلوں کے پیش نظر 12 الرٹس جاری کیے گئے۔
ایران کے بوشہر نیوکلیئر پاور پلانٹ پر حملہ
ایران کی جوہری توانائی تنظیم کے مطابق ایک پروجیکٹائل نیوکلیئر پاور پلانٹ کے احاطے میں آکر گرا، حملے میں کوئی جانی مالی یا تکنیکی نقصان نہیں ہوا، اور نہ ہی پلانٹ کے مختلف حصوں کو کوئی نقصان پہنچا۔
انٹرنیشنل اٹامک انرجی ایجنسی نے بھی حملے کی تصدیق کر دی
انٹرنیشنل اٹامک انرجی ایجنسی (اے ای او آئی) نے حملے کی تصدیق کرتے ہوئے کہا کہ پُرامن نیوکلیئر تنصیبات پر حملے بین الاقوامی قوانین کی صریح خلاف ورزی ہیں، جو ایسے مراکز کو فوجی کارروائی سے استثنا دیتے ہیں، اس کے علاقائی سلامتی پر خطرناک نتائج مرتب ہو سکتے ہیں۔
ایران اور لبنان میں کارروائیاں مذاکرات کے باوجود برقرار ہیں، اسرائیلی فوج
اسرائیلی فوج کا کہنا ہے کہ ایران اور لبنان میں کارروائیوں کے منصوبے کسی بھی مذاکرات کے باوجود برقرار ہیں، ایران اور لبنان میں غیر بدلنے والے منصوبے کے تحت کارروائی کر رہے ہیں، چاہے جنگ ختم کرنے کیلئے کسی بھی قسم کی بات چیت کی جا رہی ہو۔
اسرائیلی فوجی ترجمان نے کہا کہ چاہے یہ یا وہ معاہدہ ہو، ہم اس وقت غیر بدلنے والے منصوبے کے مطابق کارروائی کر رہے ہیں، ہم کارروائی کر رہے ہیں اور کرتے رہیں گے تاکہ نقصان کو بڑھایا جا سکے اور وجودی خطرات کو ختم کیا جا سکے۔
اسرائیل کی بیروت کے جنوبی مضافات کے علاقوں کو خالی کرنے کی دھمکیاں
غیر ملکی خبر رساں اداروں کے مطابق اسرائیلی فوج نے لبنان کے دارالحکومت بیروت کے جنوبی مضافاتی علاقوں کے متعدد محلوں کے رہائشیوں کو فوری طور پر انخلا کی دھمکی دی ہے۔
اسرائیلی فوج کے ترجمان نے کہا ہے کہ فوج بیروت کے جنوبی علاقوں میں موجود حزب اللہ کے انفراسٹرکچر کو نشانہ بنانے کی کارروائیاں جاری رکھے گی۔
اسرائیل اس ہفتے کسی بھی ممکنہ مذاکرات کا حصہ نہیں، اسرائیلی سفیر
اقوام متحدہ میں اسرائیل کے سفیر نے کہا ہے کہ اسرائیل اس ہفتے متوقع امریکا اور ایران کے درمیان کسی بھی ممکنہ مذاکرات کا حصہ نہیں ہے۔
صحافیوں سے گفتگو کرتے ہوئے انہوں نے کہا کہ امریکا اور اسرائیل ایران میں فوجی اہداف کو نشانہ بنا رہے ہیں اور یہ کارروائیاں جاری رہیں گی، دونوں ممالک کی جانب سے ایران پر کیے گئے حملوں نے بہت کچھ حاصل کیا ہے، تاہم ابھی تمام مقاصد حاصل نہیں ہوئے۔
