تلوں کے تیل کے 6اہم خواص
تلوں کو تو آپ نے دیکھا ہوگا مگر کیا اس کے تیل کو کبھی استعمال کیا؟ اگر نہیں تو آپ یقیناً اس کے حیرت انگیز فوائد سے بھی واقف نہیں ہوں گے۔حالیہ طبی تحقیقی رپورٹس میں اس تیل کے طبی فوائد سامنے آئے ہیں جو کہ حیران کن ہیں کیونکہ یہ جلد، بالوں کو بہتر بنانے کے ساتھ ساتھ مختلف امراض سے بھی تحفظ دیتا ہے۔تو یہاں اس کے فوائد کو جانیے۔
سگریٹ نوشی کے نقصان کا تریاق
فری ریڈیکلز ہمارے ڈی این اے، خلیات اور پروٹینز کو نقصان پہنچاتے ہیں جس کے نتیجے میں الزائمر، پارکنسن اور کینسر کا خطرہ بڑھ جاتا ہے، کچھ چیزیں جیسے تمباکو نوشی، کیڑے مار ادویات، ہوائی آلودگی اور جنک فوڈ ان فری ریڈیکلز سے بھرپور ہوتے ہیں، تو اس کیلئے ضروری ہے کہ ہماری غذا اینٹی آکسیڈنٹس سے بھرپور ہو تاکہ فری ریڈیکلز کے نقصان سے بچ سکیں جبکہ جسم میں آکسائیڈیٹو اسٹریس بھی کم ہو۔ ایسے شواہد سامنے آئے ہیں کہ تلوں کے تیل کا استعمال اس حوالے سے فائدہ مند ہوتا ہے۔
دل کو صحت مند بنائے
اس وقت اچھے، برے یا نقصان دہ فیٹس والی اشیاء دستیاب ہیں، تلوں کا تیل پولی ان سچورٹیڈ اور مونو سچورٹیڈ فیٹس سے بھرپور ہوتا ہے جبکہ سچورٹیڈ فیٹس کم ہوتے ہیں جو کہ اسے دل کیلئے صحت مند اور کولیسٹرول کی سطح کنٹرول میں رکھنے کے قابل بناتے ہیں۔
دانتوں کی صفائی
طبی ماہرین کے مطابق تلوں کے تیل سے دس منٹ تک کلیاں کرنا منہ میں بکٹیریا کی سطح کم کرکے دانتوں اور مسوڑھوں کو صحت مند رکھتا ہے۔
جلد اور ہڈیوں کا فائدہ
ان تیل کا ایک جزو زنک ہے، جو کہ جسم میں کولیگن کی مقدار بڑھاتا ہے اور جلد کو لچکدار بنانے میں مدد دیتا ہے، اس طرح یہ ہڈیوں کی کثافت بڑھانے کے لیے بھی فائدہ مند جزو ہے۔
قبض دور بھگائے
لوگوں کو کبھی نہ کبھی قبض کا تجربہ ضرور ہوتا ہے، مناسب مقدار میں پانی پینا اور غذا میں فائبر کی موجودگی اس سے بچائومیں مددگار ہوتا ہے، تاہم تلوں کا تیل بھی قبض کو دور کرتا ہے۔ ایک سے دو چائے کے چمچ اس تیل کا استعمال آنتوں کو حرکت میں لاکر قبض کی شکایت کم کرتا ہے۔
بالوں کو چمکدار اور گھنا بنائے
بالوں روکھے ، بے جان یا گرنے لگے تو اکثر افراد مہنگی مصنوعات کا استعمال کرتے ہیں۔ ایسے افراد کیلئے تلوں کا تیل فائدہ مند ہے، جس میں وٹامن بی اور ای، میگنیشم، کیلشیئم اور فاسفورس ہوتے ہیں جو کہ بالوں اور کھوپڑی کیلئے ضروری اجزاء ہیں۔ اس کی معمولی سی مقدار سے سر پر مالش کریں اور تیس منٹ تک کیلئے چھوڑ دیں، اس کے بعد گرم پانی اور شیمپو سے بال دھو لیں۔
