’’میں نہیں جانتا‘‘
ایک صاحب نے اپنے بیٹے کا ٹیسٹ لینا چاہا۔ فارسی کی کتاب الٹ پلٹ کرتے ہوئے وہ بیٹے سے بولے ’’بتاؤ ’’نمید انم‘‘ کے معنی کیا ہوتے ہیں؟‘‘۔
’’میں نہیں جانتا‘‘ لڑکے نے جواب دیا۔ باپ کو بے حد غصہ آیا اور لگے بیٹے کو پیٹنے۔ مار مار کر اس کا بھر کس نکال دیا اور بولے ’’چلو میں تمہارے استاد سے پوچھتا ہوں، اتنا عرصہ تمہیں کیا پڑھاتے رہے ہیں؟‘‘
غصے کے عالم میں وہ صاحب استاد پر برس پڑے اور بولے ’’مفت کی تنخواہیں بٹورتے ہو اور یہاں آ کر اپنا اور بچوں کا مفت میں وقت ضائع کرتے ہو۔ میں تمہارے خلاف رپورٹ کروں گا‘‘
ماسٹر نے پوچھا ’’آخر ہوا کیا ہے‘‘؟۔ ’’میں نے فارسی کی کتاب سے صرف ایک لفظ پوچھا تھا اسے وہ بھی نہیں آیا‘‘۔
’’کیا پوچھا تھا؟‘‘ میں نے اس سے پوچھا تھا ’’نمید انم‘‘ کے معنی کیا ہوتے ہیں‘‘۔
ماسٹر صاحب لڑکے کی طرف متوجہ ہو کر بولے ’’کیوں بھئی بتاؤ ’’نمید انم‘‘ کے معنی کیا ہوتے ہیں‘‘؟۔ ’’میں نہیں جانتا‘‘ لڑکے نے جواب دیا۔
’’ٹھیک ہی تو کہہ رہا ہے کہ میں نہیں جانتا‘‘۔ تب ماسٹر صاحب نے انہیں بتایا کہ ’’نمید انم‘‘ کے معنی ہی میں نہیں جانتا ہوتے ہیں‘‘۔
