مسائل اور ان کا حل
اذان کے اختتام تک سحری کھانا : سوال: ایک شخص سحری کر رہا تھا کہ اسی دوران اذان فجر شروع ہو گئی لیکن یہ شخص اذان کے اختتام تک کھانا کھاتا رہا تو اس کے روزے کے بارے میں کیا حکم ہے؟ کیا کوئی ایسی روایت موجود ہے کہ جس میں یہ فرمایا گیا ہو سحری کا وقت ختم ہونے کے باوجود کسی آدمی نے ہاتھ میں کوئی لقمہ کھانے کی نیت سے اٹھایا ہوا تھا اور اذان شروع ہو گئی تو اس کو کھا لینے کے باوجود بھی اس کا روزہ صحیح ہو جائے گا۔(طاہر علی، شیخوپورہ)
جواب:۔اذان فجر صبح صادق کے طلوع ہونے کے بعد دی جاتی ہے اور صبح صادق کے وقت شروع ہوتے ہی روزہ دار کیلئے کھانا پینا ممنوع ہو جاتا ہے۔ لہٰذا صورت مسئولہ میں مذکورہ شخص کا یہ روز ہ درست نہیں ہوا، اس کا اس دن کے روزہ کی قضاء لازم ہے، نیز اس پر لازم ہے کہ اس پر تو بہ کرے اور آئندہ احتیاط کرے اور صبح صادق ہونے سے ایک دومنٹ پہلے سحری کھانا ختم کر دے۔ نیز سوال میں ذکر کردہ مفہوم سے متعلق روایت موجود نہیں۔ (وفی الفتاوی الہندیۃ 491/1)
چار رکعت تراویح پڑھنے کے بعد بیٹھنا
سوال: 4 رکعت سنت تراویح پڑھنے کے بعد جو بیٹھ کر تسبیح پڑھتے ہیں وہ کتنی دیر بیٹھنا چاہیے؟ کیونکہ حافظ صاحب تسبیح بھی مکمل نہیں پڑھنے دیتے۔ قرآن و سنت کی روشنی میں جواب عطا فرمائیں (حاجی نذیر حسین ،چکوال)
جواب:تراویح میں ہر چار رکعت کے بعد عام چار رکعتوں کی مقدار بیٹھنا مستحب ہے۔ اگر نمازیوں کو گرانی ہو یا جماعت میں لوگ کم ہونے کا اندیشہ ہو تو اس مقدار میں کمی بھی کی جا سکتی ہے۔ اس میں کسی تسبیح کا پڑھنا بھی شرعاً لازم یا مسنون نہیں ہے بلکہ سکوت اختیار کرنا یا کچھ ذکر کر لینا بھی درست ہے۔ (در المختار ،2/ 46)
گزشتہ برسوں کی زکوٰۃ
سوال :اگر کسی نے گزشتہ کئی برسوں سے زکوٰۃ ادا نہیں کی تو اب وہ کس طرح ادا کرے، تھوڑا تھوڑا کرکے پورے سال میں دینا جائز ہے یا ایک ساتھ ہی دینا ہوگا؟(جویریہ، لاہور)
جواب : اگر گزشتہ برسوں کی زکوٰۃ ادا نہیں کی تو زکوٰۃ معاف نہیں ہوگی ادا کرنا لازم ہے،چاہے اکٹھی اداکریں یا قسط وار تھوڑی تھوڑی کرکے ادا کردیں، دونوں صورتیں درست ہیں، البتہ جتنی جلدی ہوسکے ادا کر دینی چاہئے ۔(بدائع: 2؍7)
روزے کی حالت میں کلی کرنا
سوال:روزے کی حالت میں وضو کرتے ہوئے کلی کیسے کی جائے؟ (عبد اللہ، کراچی)
جواب: روزے کی حالت میں وضو کے دوران کلی کرنا درست ہے، زبان گیلی ہونے سے روزہ نہیں ٹوٹتا۔ تاہم کلی کرتے وقت غرغرہ کرنے سے احتراز کیا جائے اگر پانی حلق سے اتر گیا تو روزہ ٹوٹ جائے گا۔
روزے کی حالت میں آنکھ میں دوا ڈالنا
سوال :۔کیا روزے کی حالت میں آنکھ میں دوا ڈال سکتے ہیں؟(فائزہ بتول، لاہور)
جواب :۔روزے کی حالت میں آنکھ میں دوا ڈالنے سے روزہ نہیں ٹوٹتا لہٰذا آنکھ میں دوا ڈال سکتے ہیں ۔
روزے کی حالت میں انہیلر کا استعمال
سوال :۔کیا روزے کی حالت میں انہیلر کا استعمال جائز ہے ،کیا اس سے روزہ ٹوٹ جاتا ہے؟(صابر اکرم، سکھر)
جواب :۔روزے کی حالت میں انہیلر کا استعمال ممنوع ہے۔ تحقیق کے مطابق اس کے ذریعہ صرف ہوا اندر نہیں جاتی بلکہ دوا کے لطیف اور باریک اجزا بھی پیٹ میں جاتے ہیں اس لئے روزے کی حالت میں انہیلر کا استعمال جائز نہیں، روزہ ٹوٹ جائے گا۔
