عیادت
ارے ، یہ کیا ہو رہا ہے ؟ بیمار شخص نے گھبرا کر بستر سے اُٹھتے ہوئے کہا۔ ایک موٹے سے لڑکے نے اپنے بازوں کو پھیلا کر جواب دیا : چچا جان ! ڈرنے کی ضرورت نہیں ۔ ہم آپ کی عیادت کیلئے آئے ہیں ۔
عیادت ؟ بیمار شخص نے حیرت سے پوچھا ۔ مگر تم لوگ تو پورا جلوس لے آئے ہو ؟
پیچھے کھڑی خاتون ہنس پڑی : بھائی جان ! بچے ضد کر رہے تھے کہ آپ کو اکیلا نہیں چھوڑسکتے ۔
ایک بچی آگے بڑھی اور بولی : چچا ، امی کہتی ہیں بیمار آدمی کو خوش رکھنا بھی دوا جیسا ہوتا ہے ۔
بیمار شخص مسکرایا ۔ یہ بات تو بالکل درست ہے ۔
موٹے لڑکے نے فخر سے کہا : میں نے سب کو جمع کیا ۔ سوچا ، اگر ایک آدمی آئے گا تو آپ پانچ منٹ خوش ہوں گے ، لیکن اگر ہم سب آئیں گے تو آپ پورا دن خوش رہیں گے !
کمرے میں ہنسی گونج اٹھی ۔
اچھا ، پھر میرے لیے کیا لائے ہو ؟ بیمار شخص نے مذاقاً پوچھا ۔
ایک بچے نے فوراً جواب دیا :دعائیں !
دوسرے نے کہا : مسکراہٹ !
تیسرے نے کہا : اور میں اچھی خبریں لایا ہوں ۔ ہمارے محلے کی ٹیم میچ جیت گئی ہے ۔
بیمار شخص کی آنکھوں میں چمک آگئی ۔ واہ ! یہ تو واقعی اچھی خبر ہے ۔
خاتون نے نرمی سے کہا : دیکھا بھائی جان ؟ دوا جسم کو طاقت دیتی ہے ، لیکن اپنوں کی محبت دل کو طاقت دیتی ہے ۔
بیمار شخص نے سر ہلایا ۔ آج تم سب نے مجھے یہ سکھایا کہ بیماری آدھی تکلیف ہے۔ اصل علاج اپنے لوگوں کی محبت اور توجہ ہے ۔
تو پھر آپ جلدی ٹھیک ہوجائیں گے نا ؟ بچوں نے ایک ساتھ پوچھا ۔
بیمار شخص ہنستے ہوئے بولا : اگر تم سب روز آتے رہے تو میں ضرور ٹھیک ہوجائوں گا۔یہ سن کر سب بچے خوشی سے تالیاں بجانے لگے اور کمرہ قہقہوں سے گونج اٹھا ۔
Comments / رائے دیں
Share your thoughts. Comments are reviewed before they appear publicly.
Approved Comments