مولی , غذائیت سے بھرپور
اسپیشل فیچر
مولی مشہور عام جڑ ہے جس سے ہر چھوٹا بڑا واقف ہے۔ اس کا رنگ عموماً سفید ہوتا ہے لیکن اس کے علاوہ اس کا رنگ لال اور ہلکا سبز بھی ہوتا ہے اس کی دو اقسام ہیں۔ ایک لمبی اور دوسری گول گول۔ مولی شلجم کی طرح کچی سلاد کے طور پر کھائی جاتی ہے جبکہ بطور ترکاری بھی استعمال ہوتی ہے۔اس کے اجزاء میں فاسفورس‘ کیلشیم اور وٹامن سی کے علاوہ فولاد کی بھی خاصی مقدار ہوتی ہے۔ اس کا مزاج گرم خشک ہے۔ اس کے حسب ذیل فوائد ہیں۔٭… پتھری کی صورت میں گردہ و مثانہ سے ریت آنے کی حالت میں مولی کا استعمال کیا جاتا ہے۔ اگر اسے مسلسل استعمال کیاجائے تو پتھری ریزہ ریزہ ہو کر ہمیشہ کیلئے جسم سے خارج ہو جاتی ہے۔٭… یہ خود دیر ہضم ہے مگر غذا کو ہضم کر دیتی ہے۔٭… بواسیر کے مرض میں مولی کا رس اور مولی کے پتے مریض کو کھلانے سے شفا ہوتی ہے۔٭… مولی کو باریک کر کے نمک لگا کر کھانے سے جگر کی اصلاح ہوتی ہے۔٭… یرقان کے مرض میں مولی کے پتوں کا رس نکال کر چینی ملا کر پلانے سے فائدہ ہوتا ہے۔ مولی استعمال کرنے والوں کو یرقان ہونے کا امکان کم ہوتا ہے۔٭… مولی کھانے کے بعد گڑ کھانے سے مولی جلد ہضم ہو جاتی ہے اور بدبودار ڈکار وغیرہ بھی نہیں آتے۔٭… تلی کے امراض میں بھی مولی کا کھانا بہت مفید ہے۔ اس کے کھانے کا طریقہ یہ ہے کہ مولی کو چھیل کر کاٹ لیں۔ کالی مرچ اور ہلکا سا نمک لگا کر رات کو باہر اوس میں رکھ دیں۔ صبح نہار منہ کھائیں۔ ایک ہفتہ میں شفا ہوگی۔ یہی نسخہ بواسیر کیلئے بھی ہے۔ ٭… مولی کے مسلسل کھانے سے پیشاب کا رک رک کر آنا‘ جل کر آنا‘ کم آنا یا قطرہ آنا یہ تمام شکایات دور ہو جاتی ہیں۔٭… مولی کا رس آنکھوں میں ایک دو قطرے روزانہ ڈالنے سے دھند‘ پھولا‘ جالا اور موتیا بند کو بھی شفا ہوتی ہے اور نظر تیز ہو جاتی ہے۔٭… مسوڑھوں کے امراض پائیوریا اور دانتوں کی مضبوطی کیلئے مولی کو کالی مرچ لگا کر کھانے سے شفا ہوتی ہے اور دانت مختلف بیماریوں سے محفوظ رہتے ہیں۔٭… مولی کھانے سے انتڑیوں کی حرکت تیز ہو جاتی ہے جس سے قبض دور ہو جاتی ہے۔٭… یرقان کیلئے آدھ سیر مولی کے پانی میں چینی ملا کر یرقان کے مریض کو پلانے سے مرض دور ہو سکتا ہے۔٭… کان درد اور کان کے دیگر امراض کیلئے مولی کے رس میں برابر کا تلوں کا تیل ملائیں اور ہلکی آنچ پر رکھیں۔ جب رس جل جائے اور خالی تیل رہ جائے تو اسے چھان کر بوتل میں محفوظ کر لیں۔ نیم گرم تیل کے چند قطرے کانوں میں ٹپکانے سے کان درد اور کان کی دیگر بیماریاں دور ہو جاتی ہیں۔٭… مولی کا رس اگر روزانہ گنج پر ملا جائے تو بال دوبارہ اگنے شروع ہو جاتے ہیں۔ اس کے لئے ضروری ہے کہ سر کے گنج کو پہلے تولیے سے رگڑیں اور پھر مولی کے رس سے مالش کریں۔٭… بچھو پر اگر مولی کا رس ڈالا جائے تو وہ فوراً مر جاتا ہے۔٭… مولی کے بیج بھی بڑے کارآمد ہوتے ہیں۔ آدھ تولہ مولی کے بیج نیم گرم پانی سے کھلانا بند حیض میں مفید ہے۔
