گھر میں رنگوں کا استعمال
اسپیشل فیچر
گھر کی ڈیکوریشن کرتے وقت رنگوں کو بہت اہمیت دی جاتی ہے۔ تاہم یہ بات یاد رکھنی چاہیے کہ رنگوں کا بھی انتخاب سوچ سمجھ کر کرنا چاہیے کیونکہ کچھ رنگ طبیعت کو سکون فراہم کرتے ہیں اور کچھ رنگ طبیعت میں تناؤ پیدا کرتے ہیں۔ خواتین رنگوں کے انتخاب کے لحاظ سے مردوں پر سبقت لے جاتی ہیں کیونکہ ان میں جمالیاتی ذوق نسبتاً زیادہ ہوتا ہے۔ اسی لیے وہ نہ صرف رنگوں کا انتخاب بلکہ امتزاج بھی دلکش انداز میں کرتی ہیں۔ رنگوں کے انتخاب کی منصوبہ بندی کرتے وقت ہم اپنے آرام، سہولت اور جمالیاتی ذوق کو مدنظر رکھتے ہیں۔ گھر میں چھوٹے بچے ہوں تو کریم اور سفید رنگ استعمال کرنا بہت مشکل ہوتا ہے۔ اس کی بجائے قدرے گہرے رنگ منتخب کیے جاتے ہیں تاکہ بچے انہیں زیادہ خراب نہ کر سکیں یا پھر اعلیٰ معیار کے ایسے رنگ استعمال کیے جاتے ہیں جو دھوئے جانے پر دوبارہ صاف ستھرے اور داغ دھبوں سے پاک بھی ہو جاتے ہیں۔ نوجوان مختلف رنگوں کے امتزاج کو پسند کرتے ہیں جیسے ڈرائننگ روم میں سبز نارنجی رنگ بھی استعمال کر سکتے ہیں۔ لیکن عمر کے بڑھنے کے ساتھ ساتھ چونکہ انسان میں بردباری آ جاتی ہے، اس لیے شوخ کی بجائے ہلکے رنگ پسند کرنے لگتے ہیں۔ خاکی، کریم، آف وائٹ، گلابی، لیمن، قرمزی اور ہلکا بادامی رنگ پُرسکوں، پُرامن اور فرحت بخش ماحول پیدا کرتے ہیں جس میں اہل خانہ اور دوست احباب بیٹھ کر گفتگو کر سکتے ہیں۔ ان رنگوں میں یہ تاثیر ہوتی ہے کہ وہ فساد یا جارحیت کے جذبات پر غالب آ جاتے ہیں۔ یہ غیرجانبدار اور صلح پسند رنگ ہیں اور اپنے آپ میں پوری طرح مکمل ہوتے ہیں۔ اس لیے وہ جس شے پر استعمال ہوتے ہیں اسے باوقار بنا دیتے ہیں۔ یہ رنگ قدرت اور مٹی کے قریب تر ہوتے ہیں۔ سمندر سے تعلق رکھنے والے رنگ جیسے سیپی، موتی اور سمندری گھاس بہت عمدہ پس منظر پیش کرتے ہیں۔ یہ رنگ گھر کے مکینوں اور مہمانوں کو پیار و محبت اور حوصلہ افزائی مہیا کرتے ہیں۔ گھر کے وہ حصے جہاں سب سے زیادہ وقت گزارا جاتا ہے مثلاً لابی، ٹی وی کا کمرہ یا ڈرائننگ روم، وہاں رنگ سب سے زیادہ رنگ برنگے اور زندگی سے بھرپور ہونے چاہئیں۔ یہاں غیر روایتی رنگوں یعنی فیروزی اور سلور، سیاہ، نیلا اور سرخ و زرد رنگوں کا امتزاج بھلا معلوم ہو گا۔ خواب گاہ میں ذہن کو سکون بخشنے والے ہلکے رنگوں کا استعمال کریں جیسے کریم، گلابی، لیمن، خاکستری، سفید، سلور اور گولڈ کی ہلکی سی جھلک آپ کے کمرے کو روشن اور چمک دار بنا دے گی۔ بہت زیادہ اور تیز رنگ ذہن پر منفی اثر ڈالیں گے۔ رنگوں کا غیر معمولی امتزاج جیسے فیروزی، سلور یا نارنجی کھلے ذہن کی عکاسی کرتے ہیں۔ غیر روایتی رنگ استعمال کرنے والے خطرات مول لینا پسند کرتے ہیں۔ وہ دوسرے سے مختلف بن جانے کی پروا نہیں کرتے کیونکہ انہیں اپنے اوپر اعتماد ہوتا ہے۔ آپ نے ہوٹلوں، ہسپتالوں اور دفاتر میں سبز رنگ کی کھڑکیاں دیکھی ہوں گی۔ سبز رنگ قدرت کا رنگ ہے اور مناسب طریقے سے استعمال کرنے پر یہ آپ کے ذہن کو ٹھنڈک اور سکون دیتا ہے۔ سفید ایسا رنگ ہے جو حوصلے بلند کرتا ہے۔ یہ روشن اور چمک دار رنگ ہے لیکن سفید رنگ جلد میلا ہو جانے کے باعث زیادہ استعمال نہیں ہوتا۔ اس کے علاوہ سرد موسم میں سفید رنگ نظروں کو نہیں بھاتا۔ گو کہ حقیقی صلاحیتوں کو اجاگر کرتا ہے لیکن اس کی بھی زیادتی بھلی نہیں لگتی۔ رنگوں کی دنیا میں کوئی بات حتمی نہیں ہے۔ آ پ اپنی پسند اور ذوق کے مطابق ان میں تبدیلی کر سکتے ہیں۔ ضرور غور کیجیے کہ رنگوں کی مدد سے گھر کی سجاوٹ کے بعد کیا وہ آپ کی شخصیت میںکسی اضافہ کا سبب بنتے ہیں یا اس میں کمی کر دیتے ہیں۔
