مغلوں کا سامان آرائش
اسپیشل فیچر
کسی مخصوص تمدن کا تصور کرتے ہی ذہن میں اس کے سارے اجزا اکٹھا ہونے لگتے ہیں، خصوصاً وہ تمدن اور کلچر جو مغلوں کا مرہون منت ہے اور جس کا خاکہ ذہن میں تیار ہوتے ہی مختلف طرح کے خیالات آپس میں ٹکرانے لگتے ہیں۔ اس مخصوص کلچر، تہذیب و تمدن کے اہلکاروں نے اپنے وطن کو الودع کہا اور دوسرے ملکوں پر جہانبانی کی غرض سے قابض ہوئے، وہاں رہ کر انہوں نے اس ملک کو کچھ اپنی چیزیں دیں اور ان سے کچھ نئی چیزیں لیں۔ یہ معاملہ خصوصاً مغل تہذیب کے ساتھ زیادہ ہے۔ اس تہذیب کے ہر پہلو نے دوسری تہذیب سے ہمیشہ لین دین برقرار رکھا۔ فن تعمیرات ہو کہ فن موسیقی اور ادب ہو کہ فن مصوری۔ بہر طور انہوں نے فنون لطیفہ کے ہر پہلو کو متاثر کیا اور اس سے متاثر ہوئے۔
یہ سرسری جائزہ تو خارجی زندگی سے تعلق رکھتا ہے۔ اب ہم داخلی زندگی کی طرف آتے ہیں۔ داخلی زندگی میں طرزرہائش اور طرز لباس آتا ہے۔ ظہیر الدین بابر نے سلطنت مغلیہ کی بنیاد ڈالی اور جلد ہی صدائے اجل کو لبیک کہا۔ اس کے بعد ہمایوں تخت پر بیٹھا اور اس کی ساری زندگی مشکلات میں کٹی۔ ان بادشاہوں کو اتنا موقع نہ مل سکا کہ یہ برصغیر کی تہذیب کو زیادہ قریب سے دیکھ سکتے لہٰذا یہ اس تہذیبی لین دین سے محروم رہے مگر اکبر کا زمانہ کئی حیثیتوں سے بڑا اہم ہے، مغلوں کا مخصوص لباس جامہ تھا اور راجپوتوں کا مخصوص لباس تکوچیہ، لیکن اکبر کے اختراعی ذہن نے دونوں لباسوں کو بہت قریب کر دیا اور اس سے ایک نیا لباس پیدا ہو گیا۔
مغلوں کے زمانے میں کچھ مخصوص لباس تھے جو بہت عام تھے مثلاً شاہ عجیدہ، شست خط، دو تاہی اور عذر وغیرہ۔ اس میں سے عذر کی بناوٹ بالکل قبا جیسی تھی۔ فرق صرف اتنا تھا کہ عذر کی بناوٹ قبا سے کچھ لمبائی اور چوڑائی میں مختلف تھی۔ جاڑوں کے ایام میں ایک دبیز قسم کا لباس استعمال ہوتا تھا جسے قلمی کہتے تھے۔ اس لباس سے اوور کوٹ کا پورا پورا کام لیا جاتا تھا۔ چونکہ مغلوں کی زندگی میں نفاست کا کافی دخل تھا لہٰذا اس لباس میں بھی زری کا کام ہوتا تھا۔
اس سلسلے میں تیسرا لباس بھی قابل ذکر ہے اور اس کا نام ہے البقچہ۔ یہ ایک لبادے کی شکل کا لباس تھا جو خاص طور پر جامہ اور پیشواز کے اوپر پہنا جاتا تھا اور اس کا اوپری حصہ نہایت خوبصورت ڈھنگ سے تیار کیا جاتا تھا۔ اس لباس کے سامنے کی طرف مختلف جانوروں کی رنگ برنگی تصاویر ہوا کرتی تھیں جس کو مشاق قسم کا درزی بنایا کرتے تھے۔
بارش کے دنوں میں چلمان نام کا کپڑا جسم کے بچاؤ کے لیے استعمال کیا جاتا تھا، جسے موم جانہ، صوف یا سقرلات سے تیار کیا جاتا تھا۔ سردی کے دنوں میں کاندھے پر چادر ڈال کر چلنے کا رواج تھا اور کشمیری شالیں خاص طور سے اسی مقصد کے لیے استعمال کی جاتی تھیں۔
ان شہنشاہوں کے زمانے میں لباس بجنسہ اسی طرح رہا، جس طرح کہ یہ اپنے ساتھ لائے تھے۔ ایشیائے کوچک میں وہ لباس جو روزمرہ کی زندگی میں استعمال ہوتے تھے، ان میں جامہ، فرجی، پیشواز، شلوار اور البقچہ قابل ذکر ہیں۔ تاریخ کے اوراق اس سلسلے میں ہماری مدد نہیں کرتے کہ آیا ان کے علاوہ بھی کوئی استعمال ہوتا تھا یا نہیں۔ اکبر کے دور حکومت میں مشترک قدروں کی اہمیت کو جلا بخشی گئی اور یہی نہیں بلکہ سامان آرائش و زیبائش میں بھی اس بات کا خیال رکھا گیا۔ مانسٹریٹ جو ایک پرتگیزی سیاح تھا اس نے بھی اکبر کے زمانے کے مختلف لباسوں کا اپنے سفرنامے میں تذکرہ کیا ہے۔
جہانگیر کے زمانے میں بھی اکبر کے زمانے کے سارے لباس استعمال کیے جاتے تھے، اور کچھ مخصوص لباس جہانگیر نے خود اپنے لیے وقف کر رکھے تھے، اور یہ حکم شاہی تھا کہ اسے سوائے شہنشاہ کے اور کوئی شخص استعمال نہیں کر سکتا جب تک بادشاہ خود اسے کسی خاص موقعے پر اس مخصوص لباس سے نہ نوازے۔
جہانگیر کے بعد برصغیر کے تخت پر ایک باوقار شہنشاہ آتا ہے جس کی زندگی ہمہ نفاست اور ہمہ دلفریبی ہے۔ جس کی عظمت کا نمونہ فلک بوس قلعوں کی پختہ اور بلند دیواریں اور جس کا غم تاج محل جیسا روح پرور اور جاں افروز ہے۔ اسی لیے ایک نفاست پسند شہنشاہ سے جس طرح کی امید کی جاتی تھی، اسی طرح ہوا لیکن یک بیک جب وہ اپنی زندگی میں ایک عظیم المیہ سے دوچار ہوا، اس وقت سے اس کی حیات کی رفتار مدھم ہو گئی۔ ذیقعدہ کے مہینے میں ممتاز محل نے صدائے اجل کو لبیک کہا اور شاہجہاں کے لیے یہ مہینہ ماتم کدہ بن گیا۔ اس مہینے میں وہ سوائے سفید کپڑوں کے اور کوئی کپڑا استعمال نہیں کرتا تھا اور بدھ کا دن تو ہمیشہ کے لیے اسے سوگوار بنا گیا، کیونکہ بدھ کے دل ممتاز محل کا انتقال ہوا تھا۔ لہٰذا بدھ کے دن تو وہ خاص طور سے سفید لباس ہی استعمال کیا کرتا تھا۔
اورنگ زیب کے زمانے میں خاص تغیر ہوا۔ 14 جنوری 1669ء کے فرمان کے مطابق زربفت کا لباس قانوناً بند کر دیا گیا لیکن اس کا استعمال ختم نہیں ہوا۔ بادشاہ خود سادہ کپڑوں کو ترجیح دیا کرتا تھا اور منوچی کے بیان کے مطابق اورنگ زیب کے کپڑوں کی قیمت 10 روپے سے زیادہ نہیں ہوا کرتی تھی۔
اکبر سے پہلے سر کو ڈھانکنے کے لیے دو طرح کی چیزیں استعمال کی جاتی تھیں، چونکہ سر کے بال منڈوانے کا عام روج تھا۔ اس لیے ٹوپی یا سر کے ڈھانکنے کی چیز استعمال میں لائی جاتی تھی۔ مثلاً ہمایوں کے زمانے میں تاجِ عزت اور خاصہ تاج کا عام رواج تھا۔ تاج عزت کی شکل بالکل انگریزی کے ''وی‘‘ جیسی تھی اور خاصہ تاج بادشاہ کی عطا کی ہوئی ٹوپی کا نام تھا جو اپنا مخصوص رنگ رکھتی تھی لیکن پٹرے دی ویلا کے بیان کے مطابق اکبر بال رکھنا پسند کرتا تھا۔ اس لیے اس نے ٹوپی کی اس شکل کو ترجیح دی جو اس کے بالوں کو خوبصورتی سے چھپا لے۔ لہٰذا وہ کلاہ بہت بہتر ڈھنگ سے تیار کراتا تھا جس میں سونے اور چاندی کا کام ہوتا تھا اور کلاہ میں طرے کی موجودگی کا خاص خیال رکھا جاتا تھا۔ جہانگیر اپنے سرپوش میں ہیرے اور جواہرات کا استعمال ضرور کرتا تھا۔ اس کے سر پوش کے دونوں طرف قیمتی ہیرے لٹکتے رہتے تھے اور بیچ میں طرہ ہوتا تھا۔
شاہجہاں کے زمانے میں بھی کم و بیش سرپوش کی بناوٹ یہی رہی لیکن اورنگ زیب کے زمانے میں لباسوں کی طرح سرپوش میں بھی ہیرے اور جواہرات کا استعمال منع کر دیا گیا۔
بابر اور ہمایوں کے بارے میں تو وثوق سے کچھ نہیں کہا جا سکتا کہ ان کے استعمال میں ہیرے اور زیورات ہوتے تھے یا نہیں، لیکن جہاں تک اکبر کا تعلق ہے، اسے ہیروں سے اور مختلف قسم کے زیورات سے خاص دلچسپی تھی۔ لیکن اس سلسلہ میں جہانگیر کا ذوق اکبر سے کہیں زیادہ بلند تھا۔ مانسریٹ جس نے اس کے عہد حکومت کے حالات قلمبند کیے ہیں، لکھتا ہے کہ اس کے گلے میں جواہرات کی مالائیں پڑی رہتی تھیں۔ اس کے ہاتھوں کی دونوں کہنیاں قیمتی موتیوں سے بھری رہتی تھیں۔ ہاکنس اور ٹیری کے بیان کے مطابق اس کی ہر انگلی میں انگوٹھیاں ہوتی تھیں، جن میں بیش بہا نگینے ہوا کرتے تھے۔ چونکہ اکبر شیخ سلیم چشتیؒ کے معتقدوں میں سے تھا اس لیے اس نے بچپن ہی میں جہانگیر کے کانوں میں اس رعایت کے تخت چھلے ڈال دیے تھے۔ لہٰذا وہ کانوں کے چھلے دائمی حیثیت میں تبدیل ہو گئے اور اس کے کانوں میں ہمیشہ چھلے پڑے رہنے لگے۔ ٹیری کا کہنا ہے کہ جہانگیر کی طرح دنیا میں کوئی شہنشاہ نہیں ہوا، جو اتنے بیش قیمت موتیوں اور جواہرات سے اپنے آپ کو مزین کر سکے۔
اورنگزیب نے جہاں ساری غیرضروری چیزوں کو خیرباد کہا، وہاں ہیروں اور جواہرات کے استعمال سے بھی احتراز کیا۔ لیکن ان سب چیزوں کے ساتھ روایات کا دخل ہوتا ہے۔ لہٰذا وہ ان سے بالکل نہ بچ سکا اور شاہی دستار میں ایک بیش قیمت پتھر کو جگہ دینی پڑی۔ بہت سی چیزوں کی حیثیت ذاتی ہو اکرتی تھی۔ سو وہ کچھ اورنگزیب کے ساتھ بھی رہیں لیکن اس کے لڑکے جواہرات کا استعمال کرتے تھے جس میں وہ قطعاً مخل نہیں ہوا۔
کچھ شروع ہی سے مشرق کی سرزمین میں نفاست کو بڑا دخل رہا ہے اور تمام وہ عمل جو اس سلسلے میں مفید ثابت ہو سکتے تھے، ان کو کام میں لایا گیا۔ چنانچہ اس سلسلے میں خوشبو کا استعمال کرنا بھی آتا ہے۔ اکبر کو عطر وغیرہ کا بڑا شوق تھا۔ چنانچہ اس نے الگ سے ہی ایک شعبہ کی بنیاد ڈالی جس کا ‘‘خوشبو خانہ‘‘ نام رکھا۔ اس میں مختلف قسم کی خوشبوئیں تیار کی جاتی تھیں۔ اس کے زمانے میں مختلف قسم کے عطروں کے حوالے ملتے ہیں جیسے سنتوگ، ارگجہ، گلگونہ، اور زوبہ وغیرہ۔ اکبر کے بعد جہانگیر کا دور حکومت آتا ہے۔ اس شہنشاہ کو بھی اپنے باپ کی طرح عطروں کا بڑا شوق تھا۔ اس کے علاوہ نورجہاں خوشبوؤں کے بارے میں کافی معلومات رکھتی تھی۔ اس نے کئی قسم کے عطر بھی ایجاد کیے اور یہاں تک کہ ایک عطر کا نام عطر جہانگیری بھی پڑ گیا۔ شاہجہاں کو بھی عطر سے خاص لگاؤ رہا اور اس نے اس کے استعمال کی حوصلہ افزائی کی۔
