آج کا دن
اسپیشل فیچر
نپولین کی فرانس واپسی
یکم مارچ 1815ء کو یورپ کی سیاست میں ایک اہم موڑ اس وقت آیا جب فرانس کا سابق شہنشاہ نپولین بوناپارٹ جلاوطنی ختم کر کے جزیرہ ایلبا سے فرانس واپس لوٹا۔ انہیں 1814ء میں اتحادی افواج کی فتح کے بعد اقتدار سے دستبردار کر کے ایلبا بھیج دیا گیا تھا۔واپسی پر عوام اور فوج کے ایک بڑے حصے نے ان کا استقبال کیا اور وہ دوبارہ اقتدار سنبھالنے میں کامیاب ہوگئے۔
چائنہ کی '' یونیورسل پوسٹل یونین میں شمولیت
یکم مارچ 1914ء کو چائنہ نے ''یو نیورسل پوسٹل یونین‘‘ میں شمولیت اختیار کی۔ ''یونیورسل پوسٹل یونین‘‘ ایک بین الاقوامی ادارہ ہے جو دنیا بھر کے ممالک کے درمیان ڈاک کے نظام کو منظم اور مربوط بنانے کیلئے قائم کیا گیا تھا۔
چارلی چیپلن کی نعش چوری
1978 ء میں مشہور مزاحیہ اداکار چارلی چیپلن کی نعش سوئٹزر لینڈ میں موجود ایک قبرستان سے چرا لی گئی۔ ان کی نعش کو ایک گروہ نے تاوان کیلئے چرایا تھا ۔کچھ ہفتے بعد چارلی چیپلن کی نعش جنیوا جھیل کی تہہ سے ملی اور اسے دوبارہ قبرستان میں دفنا دیا گیا۔چارلی چپلن کا انتقال 25 دسمبر 1977ء کو ہوا تھا۔
دُنیا کا پہلا نیشنل پارک
1872ء میں دنیا کے پہلے نیشنل پارک کا افتتاح کیا گیا۔ اس پارک کا نام ''ییلو سٹون‘‘ تھا۔ اس کا رقبہ 9ہزار مربع کلومیٹر ہے۔ یہ رقبے میں اتنا بڑا ہے کہ اس میں دنیا کے نصف گرم پانی کے چشموں کی تعداد بھی موجود ہے۔ اس کے علاوہ اس پارک میں 290سے زیادہ آبشاریں ہیں۔یہاں مچھلیوں، پرندوں ، ممالیہ اور رینگنے والے جانوروں کی سیکڑوں اقسام پائی جاتی ہیں۔
بوسنیا کا اعلان آزادی
1992ء میں بوسنیا نے آج کے دن آزادی کا اعلان کیا اور اور یکم مارچ کو بوسنیا میں یوم تاسیس منایا جاتا ہے۔بوسنیا یورپ میں موجود وہ ملک ہے جو پہلے یوگوسلاویہ کا حصہ ہوا کرتا تھا۔ یہ یورپ کے جنوب میں واقع ہے۔ بوسنیا کی تین اطراف سے کروشیا کے ساتھ سرحد ملتی ہے۔ بوسنیا کے پاس صرف 26 کلومیٹر کی سمندری پٹی ہے۔ مشرق میں سربیا اور جنوب میں مونٹینیگرو کے ساتھ سرحد ملتی ہے۔
'' صفر امتیازی دن‘‘
''صفر امتیازی دن‘‘ (Zero Discrimination Day) ہر سال یکم مارچ کو اقوام متحدہ (UN) اور دیگر بین الاقوامی تنظیموں کی جانب سے منایا جاتا ہے۔ اس دن کا مقصد اقوام متحدہ کے تمام ممبر ممالک میں قانون حکمرانی اور برابری کو فروغ دینا ہے۔ یہ دن سب سے پہلے یکم مارچ 2014ء کو منایا گیا تھا۔در اصل اس دن کا آغاز ''یو این ایڈز‘‘ کی طر ف سے ایچ آئی وی /ایڈزکے مریضوں کے ساتھ امتیازی سلوک کا مقابلہ کرنے کیلئے کیا گیا تھا۔
