کامیاب مذاکرات کے بعد پولٹری ٹریڈرز ایسوسی ایشن کی ہڑتال ختم
لاہور: (دنیا نیوز) حکومت سے مذاکرات کامیاب ہونے کے بعد پولٹری ٹریڈرز ایسوسی ایشن نے ہڑتال ختم کر دی۔
ذرائع کے مطابق پنجاب حکومت نے برائلر کی قیمتوں کا فارمولا بحال کر دیا جس کے مطابق حکومتی عمل دخل ختم ہوگیا، متعلقہ ایسوسی ایشنز ہی اب برائلر کی قیمتیں طے کریں گی، نئے فیصلے سے شہریوں میں تشویش کی لہر دوڑ گئی۔
ہڑتال ختم ہونے کے باوجود مارکیٹ میں برائلر گوشت کی سپلائی تاحال مکمل بحال نہیں ہوئی، سپلائی میں کمی کے باعث آج بھی بعض جگہوں پر برائلر گوشت مقررہ ریٹ سے زیادہ پر فروخت ہو رہا ہے۔
ذرائع کے مطابق آج برائلر گوشت کا ریٹ 2 روپے اضافے سے 699 روپے فی کلو مقرر کیا گیا ہے جبکہ عام دکانوں پر برائلر گوشت 800 روپے فی کلو تک فروخت ہو رہا ہے۔
مارکیٹ میں من مانے نرخ پر برائلر گوشت کی فروخت پر شہریوں میں تشویش کی لہر دوڑ گئی، شہری مہنگے گوشت کا شکوہ کرتے دکھائی دے رہے ہیں۔
شہریوں کا کہنا ہے کہ پولٹری ٹریڈرز ایسوسی ایشن کی ہڑتال کے بعد مہنگائی مزید ہوگئی، برائلر مافیا من مانے نرخوں پر گوشت کی فروخت چاہتا تھا، برائلر کے نرخوں میں حکومتی عمل دخل ختم ہونے کے بعد مافیاز کو کھلی چھٹی مل گئی ہے۔
یاد رہے کہ پولٹری ٹریڈرز نے قیمت کے تعین کے طریقہ کار پر ہڑتال کی تھی، ہڑتال کے باعث شہر میں دو روز برائلر گوشت کی دکانیں بند رہیں، آج ہڑتال ختم ہونے کے بعد گوشت کی سب سے بڑی ٹولنٹن مارکیٹ میں سرگرمیاں بحال ہو رہی ہیں۔
