پاکستان امریکا کا اقتصادی شراکت داری مزید مستحکم کرنے پر اتفاق
اسلام آباد: (دنیا نیوز) پاکستان امریکا کا اقتصادی شراکت داری کو مزید مستحکم کرنے پر اتفاق ہوا۔
وزیر تجارت جام کمال خان سے یو ایس پاکستان بزنس کونسل کے وفد نے ملاقات کی، امریکی ناظم الامور نٹالی بیکر بھی وفد کے ہمراہ موجود تھیں۔
جام کمال نے کہا کہ یو ایس پی بی سی کا دورہ دوطرفہ اقتصادی تعلقات مضبوط کرے گا، پاکستان، امریکہ کو سب سے بڑی برآمدی منڈی کے طور پر قدر کی نگاہ سے دیکھتا ہے۔
وزیر تجارت نے کہا کہ تجارتی خسارہ اور منڈی تک رسائی کے مسائل حل کرنے کے لیے جامع حکمت عملی پر کام جاری ہے۔
نٹالی بیکر نے کہا کہ سویابین کی برآمدات کی بحالی دونوں ملکوں کے مابین مضبوط تجارتی تعلقات کی عکاس ہے۔
جام کمال نے کہا کہ کپاس کے شعبے میں تعاون سے پاکستان کی ٹیکسٹائل صنعت کو فائدہ پہنچے گا، وزیراعظم شہباز شریف کی قیادت میں امریکا سے تجارتی تعلقات مزید بہتر بنانے کا عزم ہے۔
وزیر تجارت نے کہا کہ معیشت میں مثبت رجحانات اور بڑے معاشی اشاریوں میں بہتری آئی، کاروباری آسانیوں کے لیے پالیسی ریٹ، مہنگائی اور بجلی نرخوں میں کمی کی گئی۔
چارلس فری مین نے کہا کہ حکومت پاکستان کا گرمجوش خیرمقدم قابلِ تعریف ہے، یو ایس-پاکستان بزنس کونسل کا دورہ تجارتی شراکت داری کو فروغ دینے کا اہم موقع ہے۔
انہوں نے کہا کہ امریکی کمپنیوں نے پاکستان میں سرمایہ کاری میں اضافے کا عندیہ دیا ہے، پاکستان میں سرمایہ کاری کے مواقع سے فائدہ اٹھائیں گے۔
