نگران وزیراعظم نے پی سی بی کی سلیکشن کمیٹی میں متنازعہ تقرری کا نوٹس لے لیا

لاہور: (دنیا نیوز) نگران وزیراعظم انوارالحق کاکڑ نے پاکستان کرکٹ بورڈ کی سلیکشن کمیٹی میں متنازعہ تقرری کا نوٹس لے لیا۔

گزشتہ روز متنازعہ کھلاڑی سلمان بٹ کی پاکستان کرکٹ بورڈ کی سلیکشن کمیٹی میں تعیناتی پر نگران وزیراعظم انوارالحق کاکڑ نے سخت نوٹس لیا۔

نگران وزیراعظم پاکستان کرکٹ بورڈ کے سرپرست اعلیٰ ہیں، وزیراعظم کی ہدایت پر فوری طور پراس کرکٹ بورڈ میں متنازعہ تعیناتی کو منسوخ کردیا گیا، انوارالحق کاکڑ نے کہا کہ پاکستان میں ٹیلنٹ کی کمی نہیں، کرکٹ جیسے مقبول اور پاکستانیوں کے پسندیدہ کھیل کیلئے کھلاڑیوں کی سلیکشن کمیٹی کو بھی غیر متنازعہ ہونا چاہئے۔

انوارالحق کاکڑ نے پی سی بی کی سلیکشن کمیٹی میں غیر متنازعہ اور اچھی شہرت رکھنے والے سلیکٹرز کو شامل کرنے کی ہدایت کر دی، نگران وزیراعظم نے کہا کہ غیر متنازعہ اور میرٹ پر تقرر شدہ سلیکٹرز ہی پاکستان کی بین الاقوامی کرکٹ میں نمائندگی کیلئے بہترین ٹیم کا انتخاب کر سکتے ہیں۔

نگران وزیراعظم نے مزید کہا کہ پاکستان کرکٹ کو اس کے شاندار ماضی کی طرح ایک مرتبہ پھر سے کامیابی سے ہمکنارکرنے کے لئے تمام تقرریاں خالص میرٹ پر کریں گے۔
 

Advertisement
روزنامہ دنیا ایپ انسٹال کریں