آسٹریلیا کے سابق ٹیسٹ کرکٹر کیتھ اسٹیک پول 84 سال کی عمر میں چل بسے
سڈنی :(ویب ڈیسک ) آسٹریلیا کے سابق ٹیسٹ کرکٹر کیتھ اسٹیک پول 84 سال کی عمر میں انتقال کرگئے۔
کیتھ اسٹیک پول نے اپنے کرکٹ کیریئر کا آغاز 1966ء میں انگلینڈ کیخلاف ایک مڈل آرڈر کھلاڑی کے طور پر کیا تھا، وہ بلے بازی کے ساتھ ساتھ لیگ سپن بولر بھی تھے، لیکن 1969ء کے اوائل میں وہ بل لاری کے ساتھ اوپننگ کرتے تھے ۔
کیتھ اسٹیک پول کو 43 ٹیسٹ اور 6 ایک روزہ بین الاقوامی کرکٹ میچز میں آسٹریلیا کی نمائندگی کا اعزاز حاصل ہے۔
کیتھ اسٹیک پول نے 43 ٹیسٹ میچز میں 7 سنچریاں اور 14 نصف سنچریاں سکور کیں، اس دوران انہوں نے 37.42 کی اوسط سے 2807 رنز اسکور کیے، ان کی ٹیسٹ کرکٹ میں کیریئر بیسٹ اننگز 207 رنز تھی جو انہوں نے 1970ء میں گابا کے مقام پر انگلینڈ کیخلاف کھیلی تھی۔
کیتھ اسٹیک پول نے کیپ ٹاؤن میں جنوبی افریقا کیخلاف اپنی پہلی ٹیسٹ سنچری سکور کی، کیتھ اسٹیک پول 1972ء کی ایشز میں ای ین چیپل کے نائب کپتان تھے، انہیں 1973ء میں وزڈن کرکٹر آف دی ایئر قرار دیا گیا تھا۔
