شہرِقائد میں تھانیدار نے فائرنگ کرکے بیوی کو قتل کردیا
کراچی:(دنیا نیوز) شہرِقائد میں شوہر نے فائرنگ کرکے بیوی کو قتل کردیا، ملزم تھانیدار ہے جو واقعے کے بعد فرار ہوگیا ، فائرنگ کی سی سی ٹی وی فوٹیج بھی سامنے آگئی ۔
پولیس حکام کے مطابق شادمان ٹاؤن میں ملزم تبسم شیخ کی اپنی بیوی نازیہ سے تلخ کلامی ہوئی جس کے بعد ملزم نے فائرنگ کرکے نازیہ کو زخمی کردیا۔
حکام کا کہنا تھا کہ مقتولہ ہسپتال منتقلی کے دوران دم توڑ گئی جب کہ مقتولہ کی بیٹی نے بھاگ کر اپنی جان بچائی، فائرنگ کے بعد ملزم موٹر سائیکل پر باآسانی فرار ہو گیا ۔
ڈی آئی جی ویسٹ عرفان بلوچ نے کہا کہ سب انسپکٹر اور ایس آئی یو میں تعینات ہے، مقتولہ نازیہ کی ملزم تبسم شیخ سے دوسری شادی ہوئی تھی، واقعے کی تفتیش جاری ہے اور ملزم کی گرفتاری کے لیے چھاپے مارے جا رہے ہیں۔
