اے این ایف کی 7 کارروائیاں، 42.77 کلو گرام منشیات برآمد،11 ملزمان گرفتار
کراچی: (دنیا نیوز) انسدادِ منشیات فورس (اے این ایف) نے ملک کے مختلف شہروں میں 7 کارروائیوں کے دوران مجموعی طور پر 42.77 کلو گرام منشیات برآمد کرتے ہوئے 5 خواتین سمیت 11 ملزمان کو گرفتار کر لیا۔
اے این ایف کے ترجمان کے مطابق کارروائیاں لاہور، چارسدہ، ملتان، کراچی اور سیالکوٹ میں کی گئیں، ان کارروائیوں کے دوران 31 کلو 218 گرام آئس اور 9 کلو 600 گرام چرس برآمد کی گئی۔
ترجمان نے بتایا کہ ایک کارروائی میں 227 گرام وزنی 70 ہیروئن بھرے کیپسولز جبکہ دوسری کارروائی کے دوران 558 گرام وزنی 84 ہیروئن بھرے کیپسولز بھی قبضے میں لیے گئے۔
اے این ایف حکام کے مطابق گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر کے مزید تحقیقات کا آغاز کر دیا گیا ہے۔
