3 لاکھ 62 ہزار سے زائد چالان عدالتوں میں جمع نہ ہو سکے، تفصیلی رپورٹ طلب
![](https://img.dunyanews.tv/news/2024/August/08-27-24/news_big_images/833400_44614305.jpg)
لاہور: (دنیا نیوز) پنجاب میں 3 لاکھ 62 ہزار سے زائد چالان عدالتوں میں جمع نہ ہوسکے، لاہور ہائیکورٹ نے آئی جی پنجاب ڈاکٹر عثمان انور سے تفصیلی رپورٹ طلب کرلی۔
چیف جسٹس لاہور ہائیکورٹ مس عالیہ نیلم نے پنجاب میں مقدمات کے چالان عدالتوں میں بروقت پیش نہ کرنے کے معاملے پر شہری عمران کی درخواست پر سماعت کی، پراسیکیوٹر جنرل پنجاب سید فرہاد علی شاہ اور ڈی آئی جی سکیورٹی عدالت میں پیش ہوئے۔
دوران سماعت پراسیکیوٹر جنرل پنجاب سید فرہاد علی شاہ نے اعتراف کیا کہ پنجاب میں 3 لاکھ 62 ہزار 127مقدمات کے چالان عدالتوں میں جمع نہیں ہوسکے، 2017 سے لیکر جولائی 2024 تک پچاس لاکھ 31 ہزار سے زائد مقدمات درج ہوئے۔
سید فرہاد علی شاہ نے عدالت کو بتایا کہ 8سال میں 42 لاکھ 96 ہزار 500 مقدمات کے چالان عدالتوں میں جمع ہوئے، 3 لاکھ 72 ہزار 326 مقدمات کی اخراج رپورٹس مرتب ہوئیں۔
بعدازاں چیف جسٹس لاہور ہائیکورٹ مس عالیہ نیلم نے مقدمات کے چالان عدالتوں میں بروقت پیش نہ کرنے کے معاملے پر آئی جی پنجاب ڈاکٹر عثمان انور سے مقدمات کے چالانوں کی تفصیلی رپورٹ طلب کرتے ہوئے درخواست پر مزید سماعت 3 ستمبر تک ملتوی کردی۔