اسرائیل کی ٹارگٹ کلنگ: الجزیرہ کے صحافی انس 3 ساتھیوں سمیت شہید
غزہ: (دنیا نیوز) اسرائیل کے غزہ پر حملے میں معروف صحافی انس الشریف 3 ساتھیوں سمیت شہید ہوگئے۔
غزہ کے الشفاء ہسپتال کے ڈائریکٹر کے مطابق الجزیرہ کے صحافی انس الشریف اپنے ساتھیوں کے ساتھ ممکنہ طور پر اسرائیلی ٹارگٹڈ حملے میں شہید ہوئے، الجزیرہ کے مطابق 28 سالہ انس الشریف اس وقت شہید ہوئے جب ہسپتال کے مرکزی دروازے کے باہر صحافیوں کے لئے لگائے گئے ایک خیمے کو اسرائیلی فوج کی جانب سے نشانہ بنایا گیا۔
الجزیرہ کے نمائندے محمد قریقیہ ، کیمرا مین ابراہیم ظاہر اور محمد نوفل بھی اس حملے میں شہید ہوئے، اسرائیلی فوج نے حملے میں الجزیرہ کے صحافی انس الشریف کو نشانہ بنانے کی تصدیق کرتے ہوئے الزام لگایا کہ وہ حماس کے ایک سیل کی سربراہی کر رہے تھے اور اسرائیلی شہریوں اور فوجیوں پر راکٹ حملوں کی منصوبہ بندی میں ملوث تھے۔
واضح رہے کہ انس الشریف نے شمالی غزہ سے بڑے پیمانے پر رپورٹنگ کی تھی اور یہی وجہ ہے کہ اسرائیل کی جانب سے انہیں ماضی میں جان سے مارنے کی دھمکیاں دی گئیں۔
یاد رہے کہ اسرائیلی فوج کی غزہ پر بمباری کے آغاز سے اب تک 200 سے زائد صحافیوں اور میڈیا کارکنان شہید ہوچکے ہیں جن میں کئی الجزیرہ کے صحافی اور ان کے رشتہ دار بھی شامل ہیں۔
