پاکستان نے غیر معمولی سفارتی حکمت عملی سے ٹرمپ کا اعتماد جیتا: فنانشل ٹائمز
لندن: (دنیا نیوز) پاک امریکہ تعلقات میں پیش رفت پر فنانشل ٹائمز کی رپورٹ منظر عام پر آگئی۔
فنانشل ٹائمز کی رپورٹ کے مطابق فیلڈ مارشل سید عاصم منیر نے جنرل مائیکل کوریلا کی ریٹائرمنٹ پر فلوریڈا میں منعقد ہونے والی تقریب میں شرکت کی، امریکہ میں فیلڈ مارشل سید عاصم منیر کا گرمجوش استقبال کیا گیا۔
رپورٹ کے مطابق اس سے قبل فیلڈ مارشل سید عاصم منیر کی امریکی صدر سے بھی ملاقات ہوئی، فیلڈ مارشل سید عاصم منیر کے دورہ امریکہ کے بعد پاک امریکہ تعلقات میں غیر متوقع پیش رفت آئی ہے۔
فنانشل ٹائمز کی رپورٹ کے مطابق بھارت کے مقابلے میں پاکستان کو امریکہ کی جانب سے تجارتی مراعات (19% ٹیکس) اور بھارت پر سخت ٹیکس (50%) عائد کیے گئے، امریکی صدر نے پاکستان کے تیل کے ذخائر کی ترقی کے لیے معاہدے کا وعدہ کیا۔
رپورٹ کے مطابق پاکستان نے امریکہ کو سرمایہ کاری کے نئے مواقع دیئے، خاص طور پر توانائی، معدنیات اور کرپٹو میں، فنانشل ٹائمز ایشیا پیسیفک فاؤنڈیشن کے سینئر فیلو مائیکل کوگل مین کے مطابق امریکہ اور پاکستان کے تعلقات میں جو کچھ ہو رہا ہے وہ حیران کن ہے ۔
مڈل ایسٹ انسٹی ٹیوٹ کے سینئر فیلو مارون وین بوم کے مطابق پاکستان ایک نایاب ملک ہے جو چین، ایران، خلیجی ممالک، روس کے کچھ حصے اور اب دوبارہ امریکہ کے ساتھ تعلقات رکھتا ہے ۔
برطانوی اخبار کے مطابق بھارت پاکستان کی وائٹ ہاؤس میں پذیرائی سے ناراض ہے، مودی اور ٹرمپ کے درمیان کشیدگی کی اطلاع ہے جبکہ پاکستان نے جنگ بندی کے سہولت کار کے طور پر امریکی صدر کو پیش کیا۔
فنانشل ٹائمز کے مطابق پاکستان نے ورلڈ لبرٹی فنانشل کے ساتھ کرپٹو ٹوکنز کے لیے مفاہمتی یادداشت پر دستخط کیے، کرپٹو اور بلاک چین کے وزیر بلال بن ثاقب نے واشنگٹن میں تجارتی بات چیت میں حصہ لیا۔
رپورٹ کے مطابق پاکستان نے داعش کے ایک اعلیٰ دہشت گرد کی گرفتاری میں اہم کردار ادا کیا، پاکستان نے امریکہ، چین، ایران، خلیجی ممالک، اور روس کے ساتھ بیک وقت تعلقات قائم رکھے۔
فنانشل ٹائمز کی رپورٹ کے مطابق امریکہ فیلڈ مارشل سید عاصم منیر کو خطے میں سٹریٹجک ثالث کے طور پر دیکھ رہا ہے۔
