قطر کا امریکہ سے غزہ میں اسرائیلی جنگ بندی کی خلاف ورزیاں فوری رکوانے کا مطالبہ
دوحہ: (ویب ڈیسک) قطر نے امریکہ سے غزہ میں اسرائیلی جنگ بندی کی خلاف ورزیاں فوری رکوانے کا مطالبہ کر دیا۔
عالمی میڈیا کی رپورٹ کے مطابق یہ بات قطری وزیراعظم نے واشنگٹن میں امریکی وزیرِ خارجہ مارکو روبیو سے ملاقات کے بعد کہی جہاں ساتویں امریکا قطر سٹریٹجک ڈائیلاگ کے موقع پر غزہ کی بگڑتی ہوئی صورتحال پر تفصیلی بات چیت ہوئی۔
وزیرِاعظم شیخ محمد بن عبدالرحمان بن جاسم آل ثانی نے خبردار کیا ہے کہ اسرائیل کی روزانہ جنگ بندی کی خلاف ورزیاں نہ صرف موجودہ معاہدے کو کمزور کر رہی ہیں بلکہ پورے امن عمل کو سبوتاژ کرنے کے خطرے سے دوچار کر چکی ہیں۔
انہوں نے فوری طور پر جنگ بندی معاہدے کے دوسرے مرحلے کے آغاز پر زور دیتے ہوئے کہا ہے کہ تاخیر اور مسلسل خلاف ورزیاں ثالثوں کو انتہائی مشکل صورتحال میں دھکیل رہی ہیں۔
قطری وزیراعظم نے واضح الفاظ میں کہا کہ غزہ تک انسانی امداد غیر مشروط طور پر پہنچنی چاہئے اور جنگ بندی کے اگلے مرحلے کے آغاز میں اب مزید تاخیر سے کام نہیں لیا جانا چاہئے۔
ادھر الجزیرہ کی مانیٹرنگ نے دعویٰ کیا ہے کہ 10 اکتوبر کو جنگ بندی کے نفاذ کے بعد سے اب تک اسرائیل کم از کم 738 مرتبہ معاہدے کی خلاف ورزی کر چکا ہے، جس میں 394 فلسطینی شہید اور ہزار سے زائد زخمی ہوچکے ہیں۔
الجزیرہ کے چیف امریکی نمائندے ایلن فشر نے بتایا کہ واشنگٹن میں ہونے والی بات چیت کا مرکزی نکتہ اسرائیل پر دباؤ ڈالنا تھا کہ وہ اسرائیل کو غزہ میں جنگ بندی کی خلاف ورزیوں سے روکے۔
