پی آئی اے کی نجکاری 23 دسمبر کو شیڈول کے مطابق ہوگی: نجکاری کمیشن
اسلام آباد: (دنیا نیوز) سیکرٹری نجکاری کمیشن عثمان باجوہ نے اعلان کیا ہے کہ پاکستان انٹرنیشنل ایئر لائنز (پی آئی اے) کی نجکاری 23 دسمبر کو مکمل ہو جائے گی اور 19 دسمبر تک تمام معاملات طے پا جائیں گے۔
سینیٹ کی قائمہ کمیٹی برائے نجکاری کو بریفنگ دیتے ہوئے سیکریٹری نجکاری کمیشن عثمان باجوہ نے بتایا کہ پی آئی اے خریدنے والے سرمایہ کار کو نئے جہاز خریدنے پر سیلز ٹیکس ادا نہیں کرنا ہوگا، پچھلی بار 33 ارب روپے کے واجبات بھی سرمایہ کار نے ادا کرنے تھے، لیکن اب پی آئی اے خریدنے والا ایف بی آر کے 26 ارب 60 کروڑ روپے کے واجبات ادا نہیں کرے گا۔
سیکرٹری نجکاری نے مزید بتایا کہ پی آئی اے کے کامیاب بولی دہندہ پاکستان ایوی ایشن کے 7 ارب روپے بھی ادا نہیں کرے گا اور پی آئی اے کے 51 فیصد سے 100 فیصد شیئرز فروخت کیے جائیں گے، پچھلی بار آئی ایم ایف سے جی ایس ٹی پر رعایت بروقت نہیں مل سکی تھی، تاہم اب برطانیہ اور یورپ کے روٹس بھی کھل گئے ہیں۔
انہوں نے کہا کہ سرمایہ کاروں کے ساتھ حتمی کمرشل شرائط آج رات تک طے کر لی جائیں گی اور بولی میں حصہ لینے کے لیے سرمایہ کاروں کو 2 ارب روپے زر ضمانت جمع کروانی ہوگ جبکہ نجکاری کے فوراً بعد پی آئی اے میں 80 ارب روپے کی سرمایہ کاری کرنا لازمی ہوگی۔
