Published on:19 December, 2025
برسلز: (ویب ڈیسک) یورپی یونین کے رہنماؤں نے روس کے منجمد اثاثوں کے استعمال پر اتفاق نہ ہونے کے بعد یوکرین کو 90 ارب یورو کا قرض دینے پر معاہدہ کر لیا ہے۔
یورپی یونین کے رہنماؤں کا کہنا ہے کہ اس معاہدے سے اگلے دو برس تک یوکرین کی فوجی اور معاشی ضروریات پوری کی جا سکیں گی، برسلز میں ہونے والے سربراہی اجلاس میں ایک دن سے زائد طویل مذاکرات کے بعد یہ معاہدے طے پایا ہے۔
یورپی یونین کے سربراہ انتونیو کوسٹا نے معاہدے کا اعلان کرتے ہوئے ایکس پر لکھا کہ ہم نے عزم کیا اور کر دکھایا، یہ قرض یورپی یونین کے مشترکہ بجٹ کی ضمانت پر فراہم کیا جائے گا۔
یوکرین کے صدر ولادیمیر زیلنسکی نے یورپی یونین کے رہنماؤں سے مطالبہ کیا تھا کہ 200 ارب یورو کے منجمد روسی اثاثے استعمال کیے جائیں، تاہم بیلجیم جہاں روس کے سب سے زیادہ اثاثے موجود ہیں اس کی جانب سے ضمانتوں کے مطالبہ پر دیگر ممالک ایسا کرنے پر متفق نہیں ہوئے۔
وائٹ ہاؤس کے ایک عہدیدار نے بتایا ہے کہ امریکا اور روس کے حکام اس ہفتے کے آخر میں میامی میں امن منصوبے پر مزید بات چیت کے لیے ملاقات کریں گے، اس ملاقات سے متعلق اس یہ خیال ظاہر کیا جا رہا ہے کہ کریملن کے ایلچی کریل دمتریئیف میامی میں سٹیو وٹکوف اور جیرڈ کشنر سے ملاقات کریں گے۔
دوسری جانب یوکرین کے صدر ولادیمیر زیلنسکی نے اعلان کیا ہے کہ یوکرین اور امریکا کے وفود جمعہ اور سنیچر کو امریکہ میں مذاکرات کریں گے۔
انہوں نے کہا کہ وہ چاہتے ہیں کہ واشنگٹن اس بات پر مزید تفصیلات فراہم کرے کہ وہ یوکرین کو مستقبل میں کسی اور حملے سے بچانے کے لیے کون سی ضمانتیں دے سکتا ہے۔
روزنامہ دنیا ایپ انسٹال کریں
سے اہم مضامین پڑھیئے 
