کراچی میں شہریوں سے کروڑوں روپے کا بھتہ مانگا جارہا ہے: فاروق ستار
کراچی: (دنیا نیوز) متحدہ قومی موومنٹ (ایم کیو ایم) پاکستان کے رہنما ڈاکٹر فاروق ستار کا کہنا ہے کہ بھتا خوری کی لعنت نے ایک بار پھر ڈھٹائی کے ساتھ سر اٹھایا ہے، کراچی میں شہریوں سے کروڑوں روپے کا بھتہ مانگا جارہا ہے۔
ڈاکٹر فاروق ستار کا کراچی میں پریس کانفرنس کے دوران کہنا تھا کہ تاجروں کو بیرونی ممالک سے کالز اور بھتہ کی پرچیاں آرہی ہیں، تاجروں اور بلڈرز کا پاکستان کی معیشت میں بڑا کردار ہے۔
انہوں نے کہا ہے کہ کراچی 60 فیصد محاصل دیتا ہے اور شہریوں کا یہ حال ہے کہ جگہ جگہ پانی کا مسئلہ ہے، سڑکیں ٹوٹی ہوئی ہیں، شہر میں پانی ٹینکر مافیا کے ذریعے جا رہا ہے، ریاست کے اداروں کی توجہ مبذول کرائی ہے، سندھ کے وزیراعلیٰ اور چیئرمین پیپلز پارٹی بلاول بھٹو کو پکارا ہے، آباد کے چیئرمین نے درد ناک لہجے میں پریس کانفرنس کی اور بھتہ خوری کے جرم کا انکشاف بھی کیا ہے۔
ایم کیو ایم کے رہنما کا کہنا تھا کہ 10 کے قریب بلڈرز نے شکایت، 40 سے زائد اور بلڈرز ہیں جنہوں نے بھتے کی شکایات کی ہے، اب بلڈرز کے دفتر پر فائرنگ بھی شروع ہوگئی ہے، بلڈرز کا مکمل ریکارڈ بھتہ خوروں کے پاس ہے۔
انہوں نے مزید کہا ہے کہ 18ویں ترمیم کے بعد امن و امان صوبائی حکومت کی ذمے داری ہے۔
