پاکستانی جیو سائنس ایڈوانس ریسرچ لیبز کی بین الاقوامی سطح پر توثیق
اسلام آباد: (دنیا نیوز) پاکستانی جیو سائنس ایڈوانس ریسرچ لیبز کو بین الاقوامی سطح پر توثیق حاصل ہو گئی ہے جس کے بعد ان لیبز میں کیے جانے والے ٹیسٹ نتائج پوری دنیا میں قابلِ قبول ہوں گے۔
تعمیرِ نو کے بعد یہ لیبز نومبر 2025 میں دوبارہ فعال ہوئیں اور قلیل عرصے میں عالمی معیار کی سند حاصل کرنے میں کامیاب رہیں۔
ذرائع کے مطابق سپیشل انویسٹمنٹ فسیلیٹیشن کونسل (SIFC) کے بھرپور تعاون اور سہولت کاری سے جیو سائنس ایڈوانس ریسرچ لیبز نے آئی ایس او 17025 اور جوائنٹ اور ریزرو کمیٹی (JORC) سرٹیفکیشن حاصل کر لی ہے۔
آئی ایس او 17025 لیبارٹری ٹیسٹ کے نتائج کی درستگی اور صلاحیت کی بین الاقوامی توثیق فراہم کرتا ہے جبکہ JORC سرٹیفکیشن کے تحت معدنیات سے متعلق ٹیسٹ نتائج عالمی سطح پر تسلیم کیے جاتے ہیں۔
حکام کے مطابق ان لیبز نے بین الصوبائی تعاون کے ساتھ ایک جامع معدنیاتی پالیسی کا مسودہ بھی تیار کیا ہے جبکہ ملک بھر کے معدنی وسائل کے وسیع پیمانے پر نقشہ جات بنانے میں بھی اہم کردار ادا کیا گیا ہے۔
ان تمام اقدامات کا مقصد نیشنل منرل ڈیٹابیس سینٹر کے ذریعے سرمایہ کاروں کو پاکستان کے معدنی وسائل سے متعلق آن لائن اور مستند ڈیٹا فراہم کرنا ہے۔
جیولوجیکل سروے آف پاکستان کے مشیر ڈاکٹر حامد اشرف کے مطابق ایس آئی ایف سی اور حکومت کے تعاون سے جیولوجیکل سروے آف پاکستان کے تحت ایک ہم آہنگ اور یکساں ریگولیٹری فریم ورک تیار کیا گیا ہے جو معدنی شعبے میں شفافیت اور سرمایہ کاری کے فروغ میں معاون ثابت ہوگا۔
ڈائریکٹر جیو سروے آف پاکستان نغمہ حیدر نے بتایا کہ ادارے میں ہیومن ریسورس ڈویلپمنٹ سینٹر قائم کیا گیا ہے جہاں بڑی تعداد میں افراد کو تربیت دی جا چکی ہے۔
اسسٹنٹ ڈائریکٹر ماریہ اعوان کے مطابق لیبز میں معدنیات کی محفوظ اور درست شناخت کے لیے مختلف معدنی مراحل کا تعین کیا جاتا ہے اور ان کی ساخت و خصوصیات کو جدید سائنسی طریقوں سے جانچا جاتا ہے۔
ماہرین کا کہنا ہے کہ جیو سائنس ایڈوانس ریسرچ لیبز کی بین الاقوامی توثیق پاکستان کے معدنی شعبے کے لیے ایک اہم سنگِ میل ہے جس سے نہ صرف عالمی سرمایہ کاروں کا اعتماد بڑھے گا بلکہ ملک میں معدنی وسائل کی ترقی کے نئے مواقع بھی پیدا ہوں گے۔
