اسرائیلی آباد کاروں کا مسجد اقصیٰ پر دھاوا
بیت المقدس: (دنیا نیوز) اسرائیلی آباد کاروں نے مسجد اقصیٰ پر دھاوا بول دیا۔
خبر ایجنسی کے مطابق اسرائیلی آباد کار پولیس اور فوج کی نگرانی میں مسجد میں داخل ہوئے، اسرائیلیوں نے اپنی مذہبی رسومات ادا کیں، اسرائیلی آباد کاروں کی تعداد 568 کے قریب تھی۔
یہودی شرپسندوں کے قبلہ اول پر دھاوے کے موقع پر انتہا پسند مذہبی لیڈر بھی موجود تھے جنہوں نے انتہا پسند یہودیوں کو مذہبی رسومات کی رہنمائی کی اور یہودی آباد کاروں کو قبلہ اول پر دھاوے جاری رکھنے کی ترغیب دی۔
واضح رہے کہ گزشتہ دنوں بھی اسرائیلی فوج اور پولیس کی فول پروف سکیورٹی میں یہودی آباد کاروں اور صہیونی انٹیلی جنس حکام سمیت درجنوں یہودیوں نے مسجد اقصیٰ میں گھس کر بے قبلہ اول حرمتی کی تھی۔
اسرائیلی فوج کی فول پروف سکیورٹی میں درجنوں یہودی آباد کاروں نے قبلہ اول میں گھس کر مقدس مقام تلمودی تعلیمات کے مطابق اپنی مذہبی رسومات بھی ادا کی تھیں، یہودی آباد کار الگ الگ گروپوں کی شکل میں قبلہ اول میں داخل ہوئے تھے۔
خیال رہے کہ جمعہ اور ہفتے کے ایام کے سوا باقی دنوں میں یہودی آباد کار مسجد اقصیٰ میں گھس کر تلمودی تعلیمات کے مطابق مذہبی رسومات ادا کرتے ہیں۔
