پنجاب اسمبلی میں سہیل آفریدی کی آمد پر ہلڑ بازی، تحقیقاتی کمیٹی کی رپورٹ آگئی
لاہور: (دنیا نیوز) پنجاب اسمبلی میں وزیراعلی کے پی سہیل آفریدی کی آمد پر ہلڑ بازی کا معاملہ، سپیکر پنجاب اسمبلی ملک محمد احمد خان کی جانب سے بنائی گئی تحقیقاتی کمیٹی کی رپورٹ منظر عام پر آ گئی۔
رپورٹ میں ہلڑ بازی میں ملوث اشخاص کے خلاف قانونی کارروائی کرنے کی تجویز دی گئی ہے، رپورٹ میں معاملے کی تفتیش میں قانون نافذ کرنے والے اداروں کی مدد لینے کی بھی تجویز ہے۔
رپورٹ میں بتایا گیا کہ وزیراعلیٰ کے پی کی آمد پر اپوزیشن نے ساتھ آنے والے مہمانوں کی فہرست صرف ناموں پر مشتمل دی تھی، اپوزیشن کی جانب سے دی گئی ناکافی لسٹ کے باعث شناخت میں مشکلات پیش آئیں۔
مطیع اللّٰہ برقی نامی شخص نے جھوٹ بول کر اسمبلی میں داخلے کی کوشش کی، مطیع اللّٰہ برقی نے کہا کے وہ خیبرپختونخوا پی کے 89 سے ایم پی اشفاق ہیں۔
رپورٹ کے مطابق صوبائی وزیر کے پی مینا خان نے اس بات کی تصدیق بھی کی کہ مطیع اللّٰہ برقی ایم پی اے اشفاق نہیں، مطیع اللّٰہ برقی کو باہر جانے کا کہنے پر انہوں نے اسمبلی سکیورٹی کے ساتھ ہاتھا پائی کی اور گالم گلوچ کیا۔
اپوزیشن نے لسٹ حوالے کرتے وقت یقین دھانی کروائی کے شناخت کے لئے 2 پی ٹی آئی ارکان مین گیٹ پر رہیں گے، جو نہ ہو سکا، رپورٹ
رپورٹ کے مطابق اپوزیشن ارکان کی جانب سے دی گئی لسٹ میں شناختی کارڈ نمبر، تصاویر، گاڑیوں کے نمبر میں سے کچھ نہ تھا جس کے باعث شناخت میں مشکلات آئیں۔
اسمبلی سکیورٹی نے سب کو تحمل سے شناخت کی گزارش کی جس پر قافلے نے گالم گلوچ اور دھکم پیل کی، اپوزیشن کی جانب سے دی گئی لسٹ میں سزا یافتہ حیدر مجید کا نام بھی شامل تھا۔
رپورٹ کے مطابق اسمبلی سیکرٹریٹ نے موقع پر موجود اسمبلی سکیورٹی کے بیانات بھی قلم بند کئے۔
