لاہور سیالکوٹ موٹروے ایم- 3 دھند کی وجہ سے بند، پی ڈی ایم اے کا بھی انتباہ
لاہور:(دنیا نیوز) لاہور سیالکوٹ موٹروے ایم- 3 دھند کی وجہ سے بند کردی گئی۔
سینٹرل ریجن ترجمان کے مطابق موٹرویز کی بندش کا مقصد عوام کی جان و مال کا تحفظ ہے، دھند میں لین کی خلاف ورزی خطرناک حادثات کا باعث ہو سکتی ہے۔
ترجمان نے بتایا کہ روڈ یوزرز لین ڈسپلن پر سختی سے عمل کریں، شہری دن کے اوقات میں سفر کو ترجیح دیں، دھند میں صبح 10 تا شام 6 تک محفوظ سفری اوقات ہیں۔
موٹر ویز سینٹرل ریجن ترجمان کا کہنا تھا کہ ڈرائیور حضرات فوگ لائٹس لازمی استعمال کریں، غیر ضروری سفر سے اجتناب کریں،تیز رفتاری نہ کریں، آگے والی گاڑی سے محفوظ فاصلہ رکھیں اور رہنمائی اور مدد کے لیے ہیلپ لائن 130 پر رابطہ کریں۔
دوسری جانب پی ڈی ایم اے نے کہا ہے کہ پنجاب کے میدانی علاقے شدید اور غیر معمولی دھند کی لپیٹ میں ہیں،لاہور شہر و گردونواح میں بھی دھند شدت اختیار کر رہی ہے۔
ترجمان کا مزید کہنا تھا کہ دھند کی وجہ سے موٹر ویز سمیت بڑی شاہرا ہیں بند ہیں، ایمرجنسی کی صورتحال میں پی ڈی ایم کی ہیلپ لائن 1129 پر کال کریں۔
