اپنی شادی میں ہوائی فائرنگ کرنے والی دلہن گرفتار
راولپنڈی: (دنیا نیوز) پولیس نے اپنی ہی شادی میں ہوائی فائرنگ کرنے والی دلہن کو گرفتار کر لیا۔
تھانہ مندرہ کے علاقہ گوڑھا میں دلہن کے ہوائی فائرنگ کرنے کی ویڈیو وائرل ہو گئی جس پر پولیس نے واقعہ کا مقدمہ درج کرکے لڑکی کو گرفتار کرلیا۔
مقدمہ پولیس اے ایس آئی وسیم اختر کی مدعیت میں درج کیا گیا، مقدمہ کے متن میں کہا گیا کہ لڑکی کے فائرنگ کرنے کی اطلاع پر گوڑھا پہنچا، لڑکا لڑکی بھاگ نکلے۔
متن کے مطابق چند قدم کے فاصلے پر لڑکی کو گرفتار کرلیا، پستول برآمد کرلی گئی، لڑکا موقع سے بھاگ جانے میں کامیاب ہو گیا
مقدمہ کے متن کے مطابق موقع سے فرار ہونے والے لڑکے کا نام شہریار علی معلوم ہوا ہے جس کی گرفتاری کے لیے چھاپے مارے جا رہے ہیں۔
