روسی فوج کا دنیپروپیٹروفسک ریجن کے گاؤں وولنوئے پر کنٹرول حاصل کرنے کا اعلان
ماسکو: (شاہد گھمن سے) روسی وزارت دفاع نے کہا ہے کہ خصوصی فوجی آپریشن کے دوران روسی افواج نے دنیپروپیٹروفسک ریجن کے گاؤں وولنوئے پر کنٹرول حاصل کر لیا ہے۔
وزارت دفاع کے مطابق بیٹل گروپ ایسٹ نے یوکرینی دفاعی لائنوں میں پیش قدمی جاری رکھتے ہوئے فیصلہ کن کارروائی کے بعد گاؤں وولنوئے کو اپنے کنٹرول میں لے لیا، جبکہ مختلف محاذوں پر کارروائیوں میں گزشتہ 24 گھنٹوں کے دوران یوکرینی فوج کو بھاری جانی نقصان پہنچا ہے۔
بیان میں کہا گیا ہے کہ خصوصی فوجی آپریشن کے مختلف محاذوں پر روسی کارروائیوں کے نتیجے میں گزشتہ 24 گھنٹوں کے دوران یوکرینی مسلح افواج کے تقریباً ڈیڑھ ہزار اہلکار ہلاک یا ناکارہ ہوئے۔
روسی وزارت دفاع کے مطابق بیٹل گروپ نارتھ کے محاذ پر 210 سے زائد، بیٹل گروپ ویسٹ کے محاذ پر 200 تک، بیٹل گروپ ساؤتھ کے محاذ پر 195 سے زائد، بیٹل گروپ سینٹر کے محاذ پر 340 سے زائد، بیٹل گروپ ایسٹ کے محاذ پر 480 تک جبکہ بیٹل گروپ دنیپر کے محاذ پر 75 سے زائد یوکرینی اہلکار ہلاک یا ناکارہ بنائے گئے۔
وزارت دفاع کا مزید کہنا ہے کہ روسی افواج مختلف محاذوں پر اپنی کارروائیاں اور پیش قدمی جاری رکھے ہوئے ہیں، جبکہ یوکرینی فوجی تنصیبات اور دفاعی پوزیشنوں کو مسلسل نشانہ بنایا جا رہا ہے۔
Comments / رائے دیں
Share your thoughts. Comments are reviewed before they appear publicly.
Approved Comments