وزیراعظم شہباز شریف کا غزہ امن منصوبے کا خیرمقدم، فلسطینی ریاست کے قیام پر زور
اسلام آباد: (دنیا نیوز) وزیراعظم شہباز شریف نے غزہ امن منصوبے کے تحت غیر مسلح ہونے کے فریم ورک پر عمل درآمد کا خیرمقدم کرتے ہوئے کہا ہے کہ پاکستان اس پیش رفت کو مثبت قدم سمجھتا ہے۔
ایکس پر اپنے پیغام میں وزیراعظم نے بورڈ آف پیس کی نگرانی میں ہونے والی پیش رفت کا خیرمقدم کیا اور اس کامیابی کے لیے امریکہ، مصر، قطر اور ترکیہ سمیت ثالث ممالک کی سفارتی کاوشوں کو سراہا۔
— Shehbaz Sharif (@CMShehbaz) July 31, 2026
وزیراعظم شہباز شریف نے کہا کہ امریکی صدر ڈونلڈ ٹرمپ کی جرات مندانہ قیادت میں حاصل ہونے والی یہ پیش رفت بورڈ آف پیس کے لیے ایک اہم کامیابی ہے۔
انہوں نے کہا کہ پاکستان کو امید ہے کہ غزہ امن منصوبے کے تحت کیے گئے تمام وعدوں پر عمل درآمد کے لیے ٹھوس اقدامات کیے جائیں گے۔ ان کا کہنا تھا کہ یہ کوششیں فلسطینی عوام کے حقِ خودارادیت کے حصول کی راہ بھی ہموار کریں گی۔
وزیراعظم نے مزید کہا کہ امید ہے ایک قابلِ اعتماد اور مقررہ مدت پر مبنی سیاسی عمل اختیار کیا جائے گا، جس کے نتیجے میں ایک آزاد، خودمختار اور جغرافیائی طور پر متصل فلسطینی ریاست کا قیام عمل میں آئے گا۔
Comments / رائے دیں
Share your thoughts. Comments are reviewed before they appear publicly.
Approved Comments