چیف جسٹس نے پنجاب پراسیکیوشن کی کارکردگی قابلِ اطمینان قرار دے دی
اسلام آباد: (دنیا نیوز) چیف جسٹس پاکستان یحییٰ آفریدی نے پنجاب پراسیکیوشن کی کارکردگی کو قابلِ اطمینان قرار دیتے ہوئے کہا کہ پنجاب پراسیکیوشن کا طریقۂ کار اور پیشہ ورانہ کارکردگی پسند ہے۔
چیف جسٹس پاکستان یحییٰ آفریدی سے پراسیکیوٹر جنرل پنجاب چودھری عرفان صادق تارڑ کی قیادت میں وفد نے ملاقات کی۔
چیف جسٹس یحییٰ آفریدی نے کہا کہ پنجاب پراسیکیوشن میں خدمات انجام دینے والے پراسیکیوٹرز انتہائی قابل اور پیشہ ورانہ صلاحیتوں کے حامل ہیں، پنجاب پراسیکیوشن سے کسی قسم کی شکایت نہیں، کارکردگی قابلِ اطمینان ہے۔
انہوں نے کہا کہ پنجاب پراسیکیوشن کی کارکردگی دیگر صوبوں کے لیے قابلِ تقلید ہے، دیگر صوبے پنجاب پراسیکیوشن سے مدد اور رہنمائی حاصل کریں، دیگر صوبے پنجاب پراسیکیوشن کے مؤثر طریقۂ کار اور تجربات سے استفادہ کریں۔
پراسیکیوٹر جنرل پنجاب عرفان صادق تارڑ نے کہا کہ پنجاب پراسیکیوشن نے جدید تقاضوں سے ہم آہنگ مؤثر نظام وضع کیا ہے، چیف جسٹس پاکستان کی جانب سے پنجاب پراسیکیوشن کی کارکردگی کا اعتراف محکمہ کے لیے باعثِ اعزاز ہے۔
عرفان صادق تارڑ نے کہا کہ چیف جسٹس پاکستان کی حوصلہ افزائی سے افسران اور پراسیکیوٹرز کو مزید محنت کا حوصلہ ملے گا، قانون کی حکمرانی اور انصاف کی مؤثر فراہمی کے لیے اصلاحات کا سلسلہ مزید تیز کریں گے۔
Comments / رائے دیں
Share your thoughts. Comments are reviewed before they appear publicly.
Approved Comments