9 مئی مقدمات: عدالت نے عدم حاضری پر 11 پی ٹی آئی رہنماؤں کی ضمانتیں منسوخ کر دیں
کراچی: (دنیا نیوز) انسداد دہشت گردی عدالت میں پی ٹی آئی رہنماؤں کے خلاف سانحہ 9 مئی کے مقدمات کی سماعت ہوئی۔
عدالت نے عدم حاضری پر پی ٹی آئی کے 11 رہنماؤں کی ضمانتیں منسوخ کر دیں، عدالت نے تمام 11 ملزمان کے وارنٹ گرفتاری جاری کر دیئے۔
ملزموں میں فردوس شمیم نقوی، خرم شیرزمان، راجہ اظہر، عدیل احمد شامل ہیں، عالمگیر خان، فہیم خان، شیخ محبوب جیلانی، محمد طاہر، حنیف خان، رواض خان اور محمد فیضان بھی ملزموں کی فہرست میں شامل ہیں۔
پراسیکیوٹر غلام عباس کے مطابق تمام ملزمان آج عدالت میں پیش نہیں ہوئے، ملزمان کے وکلا کی جانب سے حاضری سے استثنیٰ کی درخواست جمع کروائی گئی تھی، عدالت نے تمام 11 ملزمان کی حاضری سے استثنیٰ کی درخواست مسترد کر دی۔
عدالت نے ملزمان کے ناقابل ضمانت وارنٹ گرفتاری جاری کر دیئے، عدالت نے پولیس کو ملزمان کو گرفتار کر کے عدالت میں پیش کرنے کا حکم دے دیا۔
پولیس کے مطابق ملزمان کے خلاف فیروز آباد، ٹیپو سلطان، مبینہ ٹاؤن سمیت دیگر تھانوں میں مقدمات درج ہیں، ملزمان پر 9 مئی 2023 کو جلاؤ گھیراؤ، سرکاری املاک کو نقصان پہنچانے سمیت متعدد الزامات ہیں۔
