کراچی : راشن تقسیم کے دوران بھگدڑ مچنے سے بزرگ خاتون جاں بحق، متعدد خواتین زخمی
کراچی:(دنیا نیوز) شہر قائد کےعلاقے مدینہ کالونی میں راشن کی تقسیم کے دوران بھگدڑ مچنے سے بزرگ خاتون جاں بحق، جبکہ متعدد خواتین زخمی ہوگئیں۔
ریسکیو حکام کے مطابق نجی این جی او کی جانب سے غریب اور نادار لوگوں میں راشن تقسیم کیا جا رہا تھا، تقسیم کے آغاز سے قبل ہی خواتین اور بچوں سمیت عوام کی بڑی تعداد جمع ہوگئی، حکام کی جانب سے جیسے ہی آفس کا گیٹ کھولا گیا تو بڑی تعداد میں خواتین اندر کی جانب بھاگیں۔
اسی دوران بھگدڑ کے باعث کچھ خواتین زمین پر گر گئیں، زمین پر گرنے سے 4 سے 5 خواتین زخمی ہوئیں جبکہ ایک ضعیف خاتون کے اوپر سے لوگ بھاگ کرگئے، جس کے نتیجے میں وہ ضعیف خاتون جاں بحق ہوگئی۔
واقعہ کی اطلاع ملتے ہی پولیس کی بھاری نفری جائے وقوع پر پہنچ گئی، پولیس حکام نے کہا کہ نجی این جی او کی جانب سے پارک میں راشن تقسیم کیا جارہا تھا۔
ریسکیو حکام کی جانب سے جاں بحق خاتون کی لاش کو ضابطے کی کارروائی اور زخمیوں کو طبی امداد کی فراہمی کے لیے ہسپتال منتقل کردیا گیا۔
دوسری جانب پولیس حکام نے کہا کہ وقوعہ کے حوالے سے معلومات حاصل کی جا رہی ہیں اور قانون کے مطابق کارروائی کی جائے گی۔
