دنیاپور: گیس ری فلنگ دکان میں سلنڈر دھماکہ، دکاندار جاں بحق، 4 افراد زخمی
لودھراں: (دنیا نیوز) دنیاپور کے ریلوے روڈ پر واقع گنجان آباد علاقے میں گیس ری فلنگ دکان میں گیس سلنڈر پھٹنے سے ہولناک دھماکہ ہوا جس کے نتیجے میں دکاندار جاں بحق جبکہ 4 افراد زخمی ہو گئے۔
ریسکیو حکام کے مطابق دھماکہ اس وقت ہوا جب دکان میں موجود افراد سردی سے بچنے کے لیے آگ تاپ رہے تھے، اچانک ہونے والے زور دار دھماکے سے قریبی دکانوں کی کھڑکیوں کے شیشے ٹوٹ گئے اور علاقے میں خوف و ہراس پھیل گیا۔
مقامی افراد کا کہنا ہے کہ دکاندار نے سردی کے باعث دکان میں آگ جلا رکھی تھی جس کے باعث گیس سلنڈر میں دھماکہ ہوا، زخمیوں کو فوری طور پر قریبی ہسپتال منتقل کر دیا گیا ہے جہاں انہیں طبی امداد دی جا رہی ہے۔
ریسکیو حکام کے مطابق امدادی کارروائیاں مکمل کر لی گئی ہیں جبکہ واقعے کی مزید تفتیش جاری ہے، دھماکے کے باعث قریبی دکانوں کو بھی جزوی نقصان پہنچا ہے۔
