جوس فروش کروڑوں روپے کا انکم ٹیکس نوٹس ملنے پر حیرت میں مبتلا
اتر پردیش: (ویب ڈیسک) بھارت میں کروڑوں روپے کا انکم ٹیکس نوٹس ملنے پر جوس فروش کے ہوش اڑ گئے۔
انڈین میڈیا کی رپورٹس کے مطابق بھارت کی ریاست اتر پردیش کے علاقے سرائے رحمان کے رہائشی جوس فروش محمد رئیس 18 مارچ کو 7.79 کروڑ (بھارتی روپے) کا انکم ٹیکس نوٹس موصول ہوا جس پر وہ حیرت میں مبتلا ہوگیا۔
نوٹس کا جواب دینے سے قاصر محمد رئیس نے اس بارے میں فوری طور پر دوستوں سے مدد طلب کی، نوٹس میں اسے 28 مارچ تک جواب دینے کی ہدایت کی گئی ہے۔
میڈیا سے گفتگو کرتے ہوئے جوس فروش محمد رئیس نے بتایا کہ نوٹس میں مجھے انکم ٹیکس کیلئے وکیل کی خدمات لینے کو کہا گیا ہے تاکہ مسودہ تیار کرنے سے پہلے بینک اکاؤنٹ کا ریکارڈ اکٹھا کر لیں۔
محمد رئیس روزانہ بمشکل 400 روپے کماتا ہے اور بیمار والدین سمیت اپنے پوری فیملی کی کفالت کرتا ہے، محکمہ انکم ٹیکس کے غیر متوقع نوٹس نے اسے شدید پریشانی میں مبتلا کر دیا ہے۔
جوس فروش نے بتایا کہ نوٹس ملنے پر ذہنی تناؤ کا شکار ہوں اور میرا بلڈ پریشر بڑھ گیا ہے، نہیں جانتا کہ اس مسئلے سے کیسے نمٹا جائے، والدہ پہلے سے ڈپریشن کا شکار ہیں جو نوٹس سے مزید بے چین ہوگئی ہیں۔
