سردیوں میں جلد کی حفاظت
سردی میں اپنی اور بچوں کی صحت کی حفاظت کرنا آسان کام نہیں، کھانسی، نزلہ، زکام، گلے کی خرابی، سستی، تھکاوٹ، پیر کی جلد کا پھٹ جانا عام مسائل ہیں ۔اس موسم میں ہماری جلد خشک اور خارش زدہ سی ہو جاتی ہے۔ کچھ خواتین سردی کے موسم میں رنگت متاثر ہونے کی شکایت کرتی ہیں، معاملہ یہ ہے کہ خشک جلد، سورج کی شعاعوں کا اثر بہت تیزی سے قبول کرتی ہے، اس لئے نازک اور نرم و ملائم جلد جھلس جاتی ہے اور سیاہ پڑنے لگتی ہے۔ سردی کے موسم میں نوجوان لڑکیوں کا سب سے بڑا مسئلہ ہی جلد کی حفاظت ہے۔
سردی میں جلد کے امراض بھی ابھر کر سامنے آتے ہیں۔ ان سے بچنے کیلئے احتیاط اور تدبیر سب سے اہم ہے ساتھ علاج بھی ضروری ہے۔
ایگزیما
سردی میں ایگزیما بڑھ جاتا ہے، اس مسئلے سے دوچار افراد کو بہت زیادہ احتیاط کی ضرورت ہے۔ انہیں چاہئے کہ وہ اپنی غذاپر دھیان دیں۔ میٹھا کم کھائیں، بازاری کھانوں سے پرہیز کریں۔ بڑا گوشت بالکل ترک کر دیں، پھل اور سبزیوں کا استعمال زیادہ کریں۔
خشکی
سردیوں میں جب جلد خشک ہوتی ہے تو آپ کی آنکھوں کے اوپر خشکی آنے لگتی ہے، جس کی وجہ سے خارش اور آنکھ میں سرخی ہو جاتی ہے۔ بالوں میں بھی خشکی کا مسئلہ شدید ہو جاتا ہے۔ سر میں خارش ہوتی ہے اور کوئی حل نظر نہیں آتا۔ پاکستان کے وہ علاقے جہاں اونی کپڑوں کا استعمال زیادہ ہوتا ہے وہاں خشکی کے مسائل بھی زیادہ سامنے آتے ہیں۔ ایسے علاقے میں رہنے والوں کو چاہئے کہ گاجر کا جوس لازمی پئیں۔ جن بچوں کو خشک جلد کے مسائل ہوتے ہیں ان کیلئے آپ گاجر کے جوس میں سرسوں یا زیتون کا تیل ملا کر رکھ لیں اور اس تیل سے بچوں کا مساج کریں۔ یہ بہت فائدہ مند ہے۔
بالوں کے مسائل
خواتین کے حوالے سے بالوں کا تذکرہ لازم و ملزوم ہے۔ خشک موسم میں بالوں میں خشکی آنے لگتی ہے، بال روکھے ہو جاتے ہیں، جھڑنا شروع ہو جاتے ہیں۔ خشکی اور روکھے بالوں کیلئے یہ تیل تیار کر کے گھر میں رکھ لیں۔ تخم ملنگا، سفوف، زیتون کا تیل، کھوپرے کا تیل، کالی مرچ، روز مری آئل، ٹی ٹری آئل کو ملا کر بالوں کی جڑوں میں لگائیںاور دوسرے دن کسی اچھے شیمپو سے دھو لیں۔
بالوں کیلئے پروٹین کریم ، نمکین مکھن دو چمچ، انڈے کی زردی دو عدد، انار چھوٹا (چھلکے سمیت) ایک عدد دھماسہ بوٹی، پیاز کے چھلکے کا اوپر کا حصہ دو عدد، سیب کا سرکہ دو چمچ ، پانی دو پیالی۔سب سے پہلے دھماسہ بوٹی اور پیاز کے چھلکوں کو رات بھر کیلئے سرکہ اور پانی میں بھگو دیں۔ اس کے بعد اس میں انار ملا کر ابال لیں۔ جب اچھی طرح ابل جائے، اس کو مل کر چھان لیں۔ پھر اس میں انڈے کی زردی اور مکھن ملا کر اچھی طرح سے بلینڈ کر لیں، قدرتی اجزا پر مشتمل یہ مرکب آپ کے بالوں کیلئے پروٹین کریم بن جائے گی۔ یہ آپ کے بالوں کو نرم، ملائم اور چمکدار بنائے گی اور بالوں کو گھنا اور لمبا کرنے میں بھی مدد کرے گی۔
چہرے کی خوبصورتی
سردیوں میں جلد کے حوالے سے سب سے اہم مسئلہ یہ ہوتا ہے کہ چہرے پر خشکی آنے لگتی ہے جس کی وجہ سے چہرے کی رنگت خراب ہو جاتی ہے۔ ہونٹ بہت زیادہ پھٹنے لگتے ہیں، خشک ہو جاتے ہیں، ایڑھیاں پھٹنے لگتی ہیں۔ ان سب کی حفاظت کیلئے آپ کو بہت سی چیزوں کا خیال رکھنا چاہئے، جیسا کہ آپ اپنی غذا پر زیادہ دھیان دیں، پھل اور سبزیوں کا استعمال زیادہ کریں، ناریل کھائیں، ناریل کا پانی پئیں۔ پانی زیادہ سے زیادہ پئیں تاکہ آپ کے جسم کی خشکی کم ہو۔ایک ٹوٹکا نوٹ کر لیں،اس موسم میں مفید ثابت ہو گا۔
روپ نکھارنے کیلئے جوس پینا چاہئے، انار کا جوس 60ملی لیٹر، گاجر کا جوس 60ملی لیٹر، چقندر کا جوس60ملی لیٹر، چکوترا کا جوس 60ملی لیٹر، ان سب کو ملا کر ایک گلاس بن جائے گا240 ملی لیٹر۔ روزانہ صبح نہار منہ پئیں۔ خون کی کمی کو پورا کرے گا۔ روپ نکھارے گا اور Liver Detoxifyکرے گا۔
ڈاکٹر بلقیس معروف ہربلسٹ اورٹی و ی و سوشل میڈیا کی ہر دلعزیز شخصیت ہیں،
ان کے مضامین اور ویڈیوز لوگوں
میں بہت مقبول ہیں
