زمین کی گردش رُک جائے تو کیا ہو؟
پیارے بچو!زمین اپنے محور کے گرد ایک ہزار میل فی گھنٹہ سے زائد کی رفتار سے گھو م رہی ہے،تاہم اس وقت کیا ہو گااگر اس کی گرد ش اچانک رُک جائے؟اس کا جواب یہ ہے کہ ایسا ہوا تو اس کے اثرات انتہائی تباہ کُن ہوں گے۔ماہرین کے مطابق اگر زمین کا گھومنا اچانک تھم جائے تو ہر وہ چیز جو کسی دوسری چیز سے بندھی ہوئی نہیں ہے ۔اچانک مشرق کی جانب ایک ہزار میل فی گھنٹہ کی رفتار سے اُ ڑنے لگے گی۔اس کے اثرات فضا پر بھی مرتب ہوں گے اور ہوائیں اتنی طاقتور ہو جائیں گی جیسے کسی ایٹم بم کے دھماکے کے بعد ہو سکتی ہیں۔
زمین کی حرکت رُ ک جانے سے سمندروں میں بہت بڑی سونامی لہریں پیدا ہوں گی جو ایک منٹ کے اندر سترہ میل کے رقبے کو غرق کر سکیں گی۔
زمین کا ایک دن چوبیس گھنٹوں کی بجائے موجودہ365دنوں کے برابر طویل ہو جائے گا۔چھ ماہ تک سورج آگ برساتا رہے گا،اور اس کے بعد چھ ماہ کی طویل رات کے دوران ہڈیاں جما دینے والی سردی کا سامنا ہو گا۔
زمین کی حرکت تھم جانے کے نتیجے میں سورج بھی مغرب سے طلوع اور مشرق میں غروب ہو گا،اور ایسا سال میںایک بار ہی ہو سکے گا۔زمین کے گھومنے سے مرکز میں طاقت پیدا ہو تی ہے جو زمین کی موجودہ شکل کو برقرار رکھنے کا کام کرتی ہے۔ تاہم جب زمین رُک جائے گی تو سمندردونوں قطبین کی جانب منتقل ہو جائیں گے۔
اس کے نتیجے میں دو طاقت ور سمندراور ایک بہت بڑا براعظم زمین کے درمیان اُبھر آئیں گے ۔ مقناطیسی فیلڈ کی طاقت بتدریج کم ہو نے لگے گی جس کے نتیجے میں زمین جان لیوا کاسمک شعاعوں کی زد میں آ جائے گی اور نتیجتاً یہاں زندگی کی بقاء کا امکان لگ بھگ نہ ہونے کے برابر ہو گا۔
