جانوروں کی دنیا
![](https://dunya.com.pk/news/ahwalesiyasat_or_mimbromahrab/img/5256_16833097.jpg)
بٹیر دیہی علاقوں میں پایا جانے والا ایک خوبصورت پرندہ ہے۔اس کا تعلق پرندوں کے گالی فورمز خاندان سے ہے۔پرندوں کے اس بڑے خاندان میں مرغی،مور اور تیتر بھی شمال ہیں۔
بٹیر کا شمار دنیا کے خوبصورت پرندوں میں ہوتا ہے۔اس کی لمبائی دس انچ اور وزن100گرام تک ہوتا ہے۔اپنی خصوصیات میں یہ پرندہ چڑیا سے بہت ملتا جلتا ہے۔یہ بھورے،سیاہ نیلے اور سفید رنگوں میں پایا جاتا ہے۔اس کی نظر کمزورلیکن کان بہت تیز ہوتے ہیں۔یہ کافی دیر تک زمین پر چل بھی سکتا ہے کیونکہ اس کی ٹانگیں اور پنجے مضبوط ہوتے ہیں۔
اپنے چھوٹے پروں کے باعث بٹیر زیادہ دیر تک اورا ونچی پرواز نہیں کر سکتا،اس لیے زیادہ وقت زمین پر گزارتا ہے۔خطرے کے وقت یہ پرندہ یکدم فضا میں بلند ہوتا ہے اور ساٹھ کلو میٹر فی گھنٹہ کی رفتار سے پرواز کرتا ہے۔بٹیر آپس میں رابطے کیلئے سیٹی کی آواز نکالتے ہیں۔عام حالات میں اس کی آواز چپ چپ جیسی ہوتی ہے جبکہ خطرے کے وقت یہی آواز چیخ میں تبدیل ہو جاتی ہے۔
یہ اپنا گھونسلا میدان یا کھیت میں بناتا ہے۔اس کی خوراک پھل،پھول ،بیج اور زمینی کیڑے مکوڑے ہیں۔اسے پیاس بہت زیادہ لگتی ہے اس لیے دن میں کئی کئی بار پانی پیتا ہے۔بٹیر کی مادہ گرمی کے موسم میں چودہ سے بیس انڈے دیتی ہے،جو رنگ میں ہلکے اور بہت چھوٹے ہوتے ہیں۔انڈوں پر سیاہ رنگ کے دھبے ہوتے ہیں جن سے تئیس دن بعد بچے نکل آتے ہیں۔
کیلی فورنیا میں پایا جانے والا بٹیر اس ملک کا قومی پرندہ ہے۔