آج کا پکوان
![](https://dunya.com.pk/news/ahwalesiyasat_or_mimbromahrab/img/4755_81014245.jpg)
ٹٹ بٹ اسنیکس :اجزا:میدہ تین پیالی، نمک حسب ذائقہ، پسی ہوئی چینی آدھی پیالی، سفید زیرہ آدھا چائے کا چمچ، کلونجی آدھا چائے کا چمچ، کاٹج چیز آدھی پیالی، انڈا ایک عدد، گھی حسب ضرورت۔
ترکیب: میدے میں نمک اور تین کھانے کے چمچ گھی ڈال کر ملا لیں، تھوڑا تھوڑا پانی ڈالتے ہوئے سخت گوندھ لیں، گندھے ہوئے میدے کو چار حصوں میں بانٹ لیں، ایک حصے میں کلونجی ڈال کر ملا لیں اور اس کی موٹی سی چپاتی بیل کر چھوٹے چوکور ٹکڑے کاٹ لیں،ا نہیں نمکین کھجور کہا جاتا ہے، دوسرے حصے میں زیرہ ملا کر اس کی پتلی سی چپاتی بیلیں اور نمک پارے کاٹ لیں، ایک چوتھائی پیالی چینی کو گندھے ہوئے میدے کے ایک حصے میں رول کریں اور اس کی موٹی چپاتی بیل کر اس کے چھوٹے چوکور شکر پارے کاٹ لیں، کاٹج چیز میں چینی ملا کر فریج میں رکھ دیں، میدے کی چھوٹی چھوٹی سی پوریاں بیل لیں اور ان کے درمیان میں کاٹج چیز کا مکسچر رکھ کر اس کی پوٹلی سی بنالیں، کڑاہی میں گھی ڈال کر درمیانی آنچ پر گرم کریں اور ان تمام تیار کیے ہوئے سنیکس کو علیحدہ علیحدہ سنہری فرائی کرلیں۔
ویجیٹیبل چائوڈر
اجزا: گاجر ایک عدد، بروکلی سو گرام، پھول گوبھی سو گرام، پیاز ایک عدد، پارسلے ایک کھانے کا چمچ، نمک حسب ذائقہ، کچلا ہوا لہسن تین جوئے، کالی مرچ گدری پسی ہوئی ایک چائے کا چمچ، یخنی تین پیالی، میدہ دو کھانے کے چمچ، دودھ ایک پیالی، مکھن دو کھانے کے چمچ، کوکنگ آئل ایک کھانے کا چمچ۔
ترکیب: پیاز کو باریک کاٹ لیں، گوبھی، گاجر، پارسلے اور بروکلی کو صاف دھو کر باریک چوپ کر لیں، پین میں مکھن اور کوکنگ آئل ڈال کر اس میں لہسن کو ہلکا سا فرائی کریں اور اس میں تمام سبزیوں کو تقریباً چھ منٹ تک فرائی کرلیں، پھر اس میں یخنی ڈال کر ہلکی آنچ پر پکنے رکھ دیں، علیحدہ پین میں دودھ اور مید ہ ملا کر پکنے رکھیں اور لکڑ ی کا چمچ چلاتے ہوئے اسے ہلکی آنچ پر اتنی دیر پکائیں کہ یکجاں ہو کر اچھی طرح گاڑھا ہو جائے، سبزیاں مکمل گلنے پر اس میں میدے والا مکسچر ڈال دیں اورا س میں نمک اور کالی مرچ شامل کر دیں،اس کا ذائقہ بڑھانے کیلئے اس چاؤڈر کر گرم گرم ڈش میں نکال کر اس میں کش کیا ہوا چیز ڈالیں اور گرم اوون میں گرل جلا کر اتنی دیر رکھیں کہ چیز پگھل کر سنہری ہو جائے۔