دلچسپ و عجیب
دنیا کا سب سے لمبا اور زہریلا سانپ ’’کنگ کوبرا ‘‘\'ہے۔جسے مقامی زبان میں شیش ناگ کہتے ہیں۔عام طور پر اس کی لمبائی تیرہ فٹ ہوتی ہے۔اور وہ اپنے جسم کا ایک تہائی یعنی چار فٹ حصہ زمین سے کھڑا کر سکتا ہے۔کنگ کوبرا کی لمبائی18فٹ تک بھی ہو سکتی ہے۔اس کے پھن پر بنے ہوئے دو آنکھوں جیسے نشان اس کی دہشت میں اور بھی اضافہ کرتے ہیں۔اس کے حوالے سے بہت سی داستانیں مشہور ہیں۔
یہ گوشت خور ہے جس کا کاٹا ہوا جاندارچند ہی منٹوں میں مر جاتا ہے،کیونکہ اس کا زہر دوسرے سانپوں سے بہت زیادہ تیز ہے۔جب کسی جاندار کو کنگ کوبرا کاٹ لیتاہے تو اس کا دل اور پھیپھڑے فوراً کام کرنا بند کر دیتے ہیں۔یہ ایک دفعہ کاٹنے میں اپنے ڈنک سے اتنا زہر نکالتا ہے جو بیس آدمیوں یا ایک ہاتھی کو جان سے مار دینے کیلئے کافی ہوتا ہے۔
کنگ کوبرا ہندوستان ،چین کے جنوبی حصے اور شمال ایشیا کے سرسبز علاقوں میں پایا جاتا ہے۔یہ زیادہ ترسانپوں،چھپکلیوں،ان کے انڈوں یا دوسرے چھوٹے جانوروںکو کھاتا ہے۔دوسرے سانپوں کی طرح یہ بھی شکار کوثابت نگل لیتا ہے اور سب سے پہلے اس کا سر کھاتا ہے۔سانپ اپنے شکار کو چبا نہیں سکتا،اس لیے اس کے پیٹ کے اندر نہایت تیز تیزاب بنتا ہے جس کی وجہ سے اُس کا کھانا ہضم ہو جاتا ہے۔کسی بڑے شکار کو کھانے میں کوبرا کو کئی گھنٹے لگ جاتے ہیں،مگر اس کے بعد وہ کئی مہینے کچھ کھائے بغیر زندہ رہ سکتا ہے۔
کنگ کوبرا دنیا میں واحد ایسا سانپ ہے جو خود اپنا گھر بنا کر اس میں انڈے دیتا ہے۔مادہ شیش ناگ بہار کے موسم میں بیس سے پچاس انڈے دیتی ہے اور ان کی سختی سے حفاظت کرتی ہے۔ انڈوں سے جوکنگ کوبرا نکلتے ہیں وہ تقریباًڈیڑھ فٹ لمبے ہوتے ہیں اور پہلے ہی دن سے بہت زہریلے ہوتے ہیں۔
