بلوچستان میں قیام امن، حکومت کا عزم
بلوچستان طویل عرصے سے دہشتگردی، بدامنی اور انتظامی و معاشی چیلنجز کا سامنا کرتا آ رہا ہے۔ تاہم 2025ء کے دوران صوبے میں امن و امان کی صورتحال بہتر بنانے کیلئے حکومت اور سیکورٹی فورسز نے مربوط حکمت عملی کے تحت نمایاں اقدامات کئے جن کے اثرات زمینی سطح پر محسوس کئے جا رہے ہیں۔
ایڈیشنل چیف سیکر ٹری داخلہ بلو چستان حمزہ شفقات اور ڈی آئی جی کوئٹہ اعتزاز گورائیہ نے کوئٹہ میں پریس کانفرنس کر تے ہوئے بتایا کہ رواں سال بلوچستان میں دہشتگردی کے خلاف 78 ہزار سے زائد انٹیلی جنس بیسڈ آپریشنزکئے گئے ان کارروائیوں کے نتیجے میں 707 دہشتگرد ہلاک جبکہ 202 سیکورٹی اہلکار شہید ہوئے۔خاران میں ایک بڑی کارروائی کے دوران تین دہشتگرد گرفتار کئے گئے جن سے تفتیش کے بعد مزید نیٹ ورکس کے خلاف کارروائیاں جاری ہیں۔۔ایڈیشنل چیف سیکرٹری داخلہ حمزہ شفقات نے بتایا کہ رواں سال بہتر حکمت عملی کے باعث سیکورٹی فورسز پر حملوں میں نمایاں کمی آئی ہے تاہم دہشت گرد عناصر نے اپنی حکمت عملی تبدیل کرتے ہوئے عام شہریوں کو نشانہ بنانا شروع کر دیا ہے، جو ایک تشویشناک رجحان ہے۔
ایڈیشنل چیف سیکر ٹری داخلہ حمزہ شفقات کے مطابق رواں سال کی ایک بڑی سفارتی کامیابی امریکہ کی جانب سے بلوچ لبریشن آرمی (بی ایل اے) کو دہشت گرد تنظیم قرار دینا ہے جس سے عالمی سطح پر پاکستان کے مؤقف کو تقویت ملی۔ انہوں نے واضح کیا کہ بیرون ملک بیٹھ کر پاکستان میں دہشتگردی کروانے والے عناصر کے خلاف انٹرپول کے ذریعے کارروائیاں کی جائیں گی۔ ان کا کہنا تھا کہ دہشت گردی کے تانے بانے بھارت اور افغانستان سے جڑے ہوئے ہیں اور ایف سی ہیڈکوارٹر پر حملے میں ملوث عناصر کا تعلق بھی افغانستان سے تھا۔صوبائی حکومت کے مطابق وفاق کی جانب سے این ایف سی سے ہٹ کربلوچستان کو 10 ارب روپے دئیے گئے ہیں جو سیکورٹی فورسز کو مضبوط بنانے پر خرچ کئے جائیں گے۔
سیاسی مبصرین کے مطابق دہشتگردی کے خلاف کئے گئے آپریشنز اور ہلاک دہشتگردوں کے اعداد و شمار اس امر کی نشاندہی کرتے ہیں کہ ریاستی اداروں نے سیکورٹی کے محاذ پر بھرپور دباؤ برقرار رکھا ہوا ہے۔ مبصرین کا کہنا ہے کہ اگرچہ سیکورٹی فورسز پر حملوں میں کمی ایک مثبت پیش رفت ہے تاہم عام شہریوں کو نشانہ بنانا دہشت گردوں کے بدلتے ہوئے حربوں کی عکاسی کرتا ہے، جس سے نمٹنے کے لئے انٹیلی جنس نیٹ ورک کو مزید مضبوط بنانے کی ضرورت ہے۔تجزیہ نگاروں کے نزدیک بی ایل اے کو عالمی سطح پر دہشت گرد تنظیم قرار دیا جانا پاکستان کیلئے بڑی کامیابی ہے تاہم انٹرپول کے ذریعے کارروائیوں کی کامیابی کا انحصار عالمی تعاون اور سفارتی تسلسل پر ہوگا۔ ان کا کہنا ہے کہ وفاقی مالی معاونت اور قومی شاہراہوں کے تحفظ کے اقدامات اس بات کا ثبوت ہیں کہ حکومت بلوچستان میں پائیدار امن کیلئے سنجیدہ ہے لیکن دیرپا استحکام کیلئے سیکورٹی اقدامات کو سماجی، معاشی اور سیاسی اصلاحات کے ساتھ جوڑنا ناگزیر ہے۔
بلوچستان اسمبلی کے اجلاس میں صوبے کے حوالے سے ایک سوشل میڈیا چینل پر چلنے والی خبروں پر حکومتی و اپوزیشن اراکین نے شدید برہمی کا اظہار کیا۔ اراکین نے ان خبروں کو فیک نیوز قرار دیتے ہوئے سائبر کرائم قوانین کے تحت کارروائی کا مطالبہ کیا۔وزیراعلیٰ بلوچستان میر سرفراز بگٹی نے معاملے کو سنگین قرار دیتے ہوئے تحقیقات کیلئے کمیٹی تشکیل دینے اور نیشنل سائبر کرائم انویسٹی گیشن ایجنسی کو طلب کرنے کی تجویز دی۔ اپوزیشن لیڈر میر یونس عزیز زہری نے کہا کہ اس پلیٹ فارم کے ذریعے منتخب نمائندوں کی کردار کشی کی جا رہی ہے۔صوبائی وزیر سردار عبدالرحمن کھیتران نے الزامات کو بے بنیاد قرار دیتے ہوئے کہا کہ اگر ان پر کرپشن ثابت ہو جائے تو وہ اسمبلی سے مستعفی ہو جائیں گے۔ سپیکر بلوچستان اسمبلی نے رولنگ دیتے ہوئے نیشنل سائبر کرائم انویسٹی گیشن ایجنسی کے ریجنل ہیڈ کو طلب کیا ہے۔
وزیراعلیٰ میر سرفراز بگٹی کابلو چستان خشک سالی کے حوالے سے کہنا تھا کہ صوبے میں خشک سالی قدرتی عوامل کا نتیجہ ہے اور حکومت پانی کے بحران سے نمٹنے کیلئے جامع حکمت عملی تیار کر رہی ہے۔ موسمیاتی تبدیلی کے اثرات بلوچستان میں دیگر صوبوں کے مقابلے میں زیادہ شدید ہیں جبکہ صوبے کا ترقیاتی بجٹ 200 ارب روپے ہے اور مسائل اس سے کہیں زیادہ ہیں۔امن و امان پر گفتگو کرتے ہوئے وزیراعلیٰ نے کہا کہ دہشتگردی کی شرح میں نمایاں کمی آئی ہے اور آئندہ سال صورتحال مزید بہتر ہوگی۔ ان کے مطابق انٹیلی جنس بیسڈ آپریشنز کے دوران 700 سے زائد دہشت گردوں کا مارا جانا ریاستی رٹ کے قیام کی جانب ایک بڑی پیش رفت ہے۔بلدیاتی انتخابات کے متعلق انہوں نے کہا کہ نئے بلدیاتی نظام کے تحت انتخابات کرانا زیادہ مؤثر ہوگاجبکہ نئے صوبوں کے قیام پر قومی سطح پر اتفاقِ رائے کو ضروری قرار دیا۔دوسری جانب سینیٹر مولانا عبدالغفور حیدری نے کہا کہ وزیراعلیٰ کو ہٹانے یا رکھنے کا اختیار اپوزیشن کے پاس نہ ہونا صوبائی خودمختاری پر سوالیہ نشان ہے۔ ان کے مطابق اگر منتخب نمائندے محض نمائشی کردار تک محدود ہوں تو جمہوریت کا مفہوم کمزور پڑ جاتا ہے۔ انہوں نے کہا کہ آئینی ترامیم اگر عوامی مفاد کے بجائے وقتی مفادات کیلئے کی جائیں تو وہ ریاست کو اندر سے کمزور کر دیتی ہیں۔
وزیراعلیٰ کی زیر صدارت پبلک سیکٹر ڈویلپمنٹ پروگرام سے متعلق پارلیمانی کمیٹی کے اجلاس میں زراعت کے شعبے کو جدید خطوط پر استوار کرنے کیلئے ہائیڈروپونکس منصوبے کی منظوری دی گئی جو ابتدائی طور پر صوبے کے دس اضلاع میں شروع ہوگا۔ اجلاس میں اس بات پر اتفاق کیا گیا کہ کم پانی میں زیادہ پیداوار جیسے جدید زرعی طریقے بلوچستان کیلئے نہایت موزوں ہیں۔اجلاس کے دوران آبپاشی اور ڈیمز منصوبوں کا بھی تفصیلی جائزہ لیا گیا۔ وزیراعلیٰ نے ہدایت کی کہ گوادر میں زیر تعمیر ڈیمز کو صرف آبنوشی کیلئے استعمال کیا جائے اور منصوبوں کی رفتار تیز کی جائے۔ ان کا کہنا تھا کہ آبپاشی اور ڈیمز کے منصوبے بلوچستان کے زرعی مستقبل اور پائیدار ترقی کے ضامن ہیں۔ سیاسی مبصرین کے مطابق بلوچستان میں امن و امان کی مجموعی صورتحال میں بہتری آئی ہے اور ریاستی رٹ مضبوط ہوئی ہے تاہم پائیدار امن کیلئے ضروری ہے کہ سیکورٹی اقدامات کے ساتھ ساتھ ترقی، شفاف طرز حکمرانی، معاشی مواقع اور عوامی اعتماد کی بحالی کو بھی یکساں اہمیت دی جائے یہی وہ راستہ ہے جو بلوچستان کو دیرپا استحکام اور خوشحالی کی جانب لے جا سکتا ہے۔
