آج کا پکوان:مرغ دال
اجز: ایک عدد درمیانی سائز کی مرغی (گوشت)، آدھا کلو چنے کی دال، ایک عدد بڑا پیاز باریک کٹا ہوا، آدھا کلو ٹماٹر باریک کٹے ہوئے، دو عدد ہری مرچیں، چھ چمچ ادرک لہسن کا پیسٹ، ایک پیالی دہی، نمک حسبِ ذائقہ، آدھا چمچ پسی ہوئی ہلدی، ایک چمچ پسا ہوا دھنیا، دو چمچ کٹا ہوا ثابت مصالحہ، آدھا چمچ زیرہ، گرم مصالحہ حسبِ ضرورت، چند تیز پتے اور تیل حسبِ ضرورت۔
ترکیب:چنے کی دال کو اچھی طرح دھو کر تقریباً ایک گھنٹہ بھگو دیں۔ ایک دیگچی میں تیل گرم کریں اور اس میں باریک کٹا ہوا پیاز سنہری ہونے تک فرائی کریں۔ پھر ادرک لہسن کا پیسٹ ڈال کر چند منٹ بھونیں۔ اس کے بعد باریک کٹے ہوئے ٹماٹر اور ہری مرچیں شامل کریں اور اتنا بھونیں کہ ٹماٹر اچھی طرح گل جائیں۔ اب مرغی ڈال کر اس میں نمک، ہلدی، پسا ہوا دھنیا اور کٹا ہوا مصالحہ شامل کریں اور اچھی طرح بھونیں، یہاں تک کہ مرغی کا پانی خشک ہو جائے اور مصالحہ بھن جائے۔ اس کے بعد دہی شامل کرکے مزید چند منٹ بھونیں۔ اب بھگوئی ہوئی چنے کی دال ڈالیں اور حسبِ ضرورت پانی شامل کر دیں۔ درمیانی آنچ پر دال گلنے اور مرغی کے مکمل پکنے تک پکائیں۔ اگر دورانِ پکائی پانی کم ہو جائے تو ضرورت کے مطابق مزید پانی شامل کر دیں۔ جب دال اچھی طرح گل جائے اور سالن مناسب گاڑھا ہو جائے تو اس میں زیرہ، گرم مصالحہ اور تیز پتے شامل کرکے چند منٹ دم پر رکھ دیں تاکہ تمام ذائقے یکجان ہو جائیں۔
رس ملائی
اجزا : پنیر : ایک کلو،دودھ: ایک لیٹر،چینی : آدھا کپ، الائچی پاؤڈر :ایک چائے کا چمچ، زعفران: چند ریشے، پستہ اور بادام : گارنش کیلئے،میدہ : ایک چائے کا چمچ،بیکنگ پاؤڈر : ایک چوتھائی چائے کا چمچ ۔
ترکیب:پنیر کو ہموار اور نرم بنانے کے لیے 5 سے 7 منٹ تک ہاتھوں سے گوندھیں۔اس میں میدہ اور بیکنگ پاؤڈر ڈال کر مزید 3 سے 5 منٹ تک گوندھیں۔چھوٹے چھوٹے پیڑے بنا کر ایک طرف رکھ دیں۔ایک برتن میں دودھ گرم کریں اور جب ابال آ جائے تو چینی، الائچی پاؤڈر اور زعفران ڈال دیں۔دودھ کو ہلکی آنچ پر مسلسل چمچ ہلاتے ہوئے گاڑھا ہونے تک پکائیں (تقریباً 10سے15 منٹ)۔دودھ کے اُبلتے ہی اس میں تیار کیے گئے پیڑے ڈال دیں۔برتن کو ڈھانپ کر ہلکی آنچ پر 15 سے 20 منٹ پکائیں تاکہ پیڑے پھول جائیں اور دودھ کو جذب کر لیں۔چولہا بند کر کے رس ملائی کو تھوڑا ٹھنڈا ہونے دیں۔پستہ اور بادام باریک کاٹ کر اوپر چھڑک دیں۔بہترین ذائقے کے لیے رس ملائی کو چند گھنٹوں کے لیے فریج میں رکھ کر ٹھنڈا کریں۔
Comments / رائے دیں
Share your thoughts. Comments are reviewed before they appear publicly.
Approved Comments