بچوں کا انسائیکلوپیڈیا
جب ہمیں گرمی لگتی ہے تو پسینہ کیوں نکلتا ہے؟
جب ہم بہت زیادہ بھاگ دوڑ کرتے ہیں یا موسم گرما ہوتا ہے تو ہمیں پسینہ آتا ہے۔ یہ ہمار ے جسم کے درجہ حرارت کو زیادہ ہونے اور بیمار پڑنے سے بچاتا ہے۔پسینہ پانی ہے جو ہماری جلد میں پا ئے جانے والے ننھے ننھے سوراخوں سے نکلتاہے جنہیں مسام کہتے ہیں۔جبکہ ہوا چل رہی ہو یا حبس نہ ہو تو پھر گرمی نہیں لگتی اور پسینہ بھی نہیں نکلتا۔
ہماری ناک کیوں بہتی ہے؟
ہماری ناک کے اندر کی جھلی نم آلود ہوتی ہے۔جب ہمیں نزلہ ہوتا ہے تو جراثیم کو دھونے اور باہر نکال پھینکنے کے لئے ناک میں رطوبت زیادہ بنتی ہے،جس سے ہماری ناک بہنے لگتی ہے۔ جب ہم روتے ہیں اس وقت بھی ہماری ناک بہتی ہے۔ یہ اس لئے کہ آنسوایک پتلی نالی کے ذریعے ناک کے را ستے باہر نکلنے لگتے ہیں۔
ہماری انگلیوں کے نشان کیسے بنتے ہیں؟
اپنی انگلیوں کی طرف غور سے دیکھیے۔ آپ کی انگلیوں پر باریک لکیر وں کے جو نقش ہیں وہی انگلیوں کے نشان بناتے ہیں۔یہ نقش ہماری انگلیوں کو قدر ے کھردرا بناتے ہیں جس کی وجہ سے ہمیں چیزوں کو پکڑنے اور محسوس کرنے میں مدد ملتی ہے۔ ہر ایک انسان کی انگلیوں کے نشان صرف اسی کے لئے مخصوص ہوتے ہیں، ان سے ہی اس کی پہچان ہوتی ہے اوریہ تمام عمر قائم رہتے ہیں۔
ہم موٹے کیوں ہوتے ہیں؟
ہم کھانااس لئے کھاتے ہیں کہ ہمیں توانائی ملے اور ہمارا جسم مضبوط ہو۔ اگر ہم اپنے جسم کی ضرورت سے زیادہ کھائیں تووہ کھانا استعمال نہیں ہوگا اور چربی بن کر ہمارے جسم میں جمع ہوجا ئے گا جس کی وجہ سے ہم موٹے ہوجائیں گے۔ ہم جتنی کم ورزش کرتے ہیں،ہمارے جسم کو اتنی ہی کم غذا اور توانائی کی ضرورت ہوتی ہے۔
Comments / رائے دیں
Share your thoughts. Comments are reviewed before they appear publicly.
Approved Comments