انڈے کے غذائی فوائد
اسپیشل فیچر
انڈے طویل عرصے سے دنیا بھر کی غذاؤں میں ایک اہم مقام رہا ہے، جو ان کی استعداد اور غذائیت کی قدر کیلئے منایا جاتا ہے۔ یہ سادہ کھانے کی شے بے شمار فوائد پیش کرتی ہے جو متوازن غذا اور مجموعی صحت میں اہم کردار ادا کرتی ہے۔
انڈا (مرغی) مشہور عام چیز ہے جس سے تقریباً ہر شخص واقف ہے۔ دودھ کی طرح انڈے میں مکمل خوراک ہوتی ہے یعنی اس میں وہ تمام اجزاء موجود ہوتے ہیں جو صحت کو قائم رکھنے کیلئے ضروری ہوتے ہیں۔ انڈوں کی کئی اقسام ہیں۔ مثلاً مرغی کا انڈا، بطخ کا انڈا، ٹرکی کا انڈا اور شتر مرغ کا انڈا۔ مرغی کا انڈا عام طور پر زیادہ استعمال ہوتا ہے۔
انڈے میں چھلکا گیارہ حصہ سفیدی ستاون اور زردی بتیس حصہ ہوتی ہے۔ گھریلو مرغیوں کے انڈے سائز اور وزن میں مختلف ہوتے ہیں مگر ان کے اجزائے خوراک تقریباً برابر ہی ہوتے ہیں۔ تازہ انڈے کا ذائقہ نہایت عمدہ ہوتا ہے۔ دیسی مرغی ایک سال میں ساٹھ تا اسی انڈے دیتی ہیں جبکہ ولائتی مرغیاں ایک سو بیس سے ایک سو پچاس تک انڈے دیتی ہیں۔
صحیح انڈوں کی پہچان کا طریقہ یہ ہے کہ انڈے کو روشنی کی طرف کر کے دوسری طرف سے دیکھیں اگر صاف نظر آئے تو ٹھیک ہے۔ اگر اس میں کوئی داغ نظر آئے تو پھر انڈا خراب ہے۔ اس کے علاوہ انڈوں کو پانی میں ڈال کر دیکھا جا سکتا ہے۔ صحیح انڈے ڈوب جائیں گے جبکہ خراب انڈے اوپر تیریں گے۔ انڈے کا رنگ اکثر سفید ہوتا ہے۔ کچھ انڈے ہلکے بھورے بھی ہوتے ہیں۔ اس کا ذائقہ پھیکا ہوتا ہے۔ اس کا مزاج زردی مائل بہ گرمی، سفیدی سرد تر درجہ دوم اور چھلکا سرد درجہ دوم اور خشک درجہ دوم ہوتا ہے۔ اس کی مقدار خوراک دو سے چار انڈے ہے۔
انڈے کے فوائد:
1۔ انڈے خون پیدا کرتے ہیں۔
2۔ دل‘ دماغ اور باہ کو قوت دیتے ہیں۔
3۔ کمزور مریضوں کی بہترین غذا ہے۔
4۔ انڈے کی زردی سے روغن نکالا جاتا ہے جو بال اگانے میں بڑا موثر ہوتا ہے۔
5۔ عام جسمانی کمزوری میں دو انڈوں کی زردی اورسفیدی ایک پیالے میں ڈال کر اچھی طرح سے پھینٹیں اور پھر گرم دودھ پائو بھر میں تین چمچے خالص شہد ملا کر پینے سے بہت فائدہ ہوتا ہے۔
6۔ جن لوگوں کو رعشہ کی شکایت ہو ان کیلئے آدھ پکے انڈے کی زردی نہایت مفید ہوتی ہے۔ انہیں چاہئے کہ وہ روزانہ نہار منہ دو آدھ پکے انڈوں کی زردی کھائیں۔
7۔ بچوں کو قے اور دست آنے کی صورت میں ایک انڈے کی سفیدی کو پائو بھر پانی میں پھینٹ کر چینی ملا کر پلانے سے صحت ہوتی ہے۔
8۔ انڈوں کے چھلکوں کا کشتہ بنا کر سیلان الرحم اور ذیابیطس کی بیماریوں میں استعمال کرنا بے حد مفید ہے۔
9۔ انڈے کا تیل دماغی قوت بڑھانے‘ بال پیدا کرنے اور گنج دور کرنے کیلئے مفید ہے۔
10۔ انڈوں کے چھلکے خوبصورت کھلونے بنانے اور چھپکلیوں کو الماریوں سے دور رکھنے کے لئے کام آتے ہیں۔
11۔ انڈے کو ایک سال تک محفوظ رکھنے کیلئے چار پانچ کلو پانی کو دس منٹ تک ابال کر ٹھنڈا کر کے اس میں آدھا کلو سوڈیم سلی کیٹ ملا کر کسی مرتبان میں انڈے ڈال کر پانی ڈال دیں تو انڈے ایک سال تک محفوظ رہ سکتے ہیں۔
12۔ سینے کی جلن کی صورت میں گرم دودھ میں دیسی انڈا پھینٹ کر پلانے سے آفاقہ ہوتا ہے۔
13۔ گرتے ہوئے بالوں کو روکنے کیلئے انڈا پھینٹ کر بالوں کی جڑوں میں لگائیں دو گھنٹے بعد سر دھونے سے بہت فائدہ ہوتا ہے۔ کم از کم ایک ہفتہ تک یہ عمل کرنا ضروری ہوتا ہے۔
14۔ سینہ کی کھڑکھڑاہٹ اور معدہ کے منہ سے خون آنے کو روکتا ہے۔
15۔ انڈا لحمیات کا بہترین ماخذ ہے۔
٭...٭...٭
